Dempús qu’era majoritat dera societat civiu e politica aranesa acuelhesse damb maufidança era reintroduccion der os en Pirenèu, en encastre deth Programa Life dera Union Europèa (UE), es aranesi que comencen a veder-i er interès toristic. En aguesta linha, eth 1r de març der an que ven que daurirà es sues pòrtes Aran Park, un gran parc de fauna damb ossi e damb lops. D’ací a pòques setmanes es animaus que començaràn a arribar ena Val, mès qu’auràn de besonh bèth temps entà adaptar-s’i e acostumar-se ath sòn nau environament.

Segontes explicaue eth jornau Segre, eth nau recinte que serà plaçat ena municipalitat de Bossòst, que sosten eth projècte. Eth parc que nèish d’ua iniciatiua gessuda hè 10 ans, mès qu’a acumulat un retard considerable pr’amor de retards administratius e de problèmes ara ora d’arténher es permisi. Totun, eth parc qu’a compdat damb er impuls des autoritats locaus e, de hèt, se hec un concors public entà escuelher-ne eth gestionari, que guanhèc er occitan Serge Mounard, qu’espleite un parc similar en Argelèrs de Gasòst (Lavedan, Bigòrra) dempús de 1993.
 
De hèt, fòrça des animaus que provieràn de diuèrsi parcs dera Occitània grana. Atau, en ua prumèra fasa se preve que i age dus ossi, tres lops grisi, dus gatilops, dues auritles, ueit isards, sies cèrvis, sies moflons, ueit cabiròus, quate vutres e quate paoms; toti en regim de semilibertat. Es promotors deth parc calculen que vieran quauqui 20_000 visitants pendent eth prumèr an qu’eth parc e dubrirà ath public.




JC / FM