L’èx-ministre de l’economia del primièr govèrn grèc de la coalicion Syriza, Giannis Varoufakis, presidiguèt ièr a Berlin l’acte constitutiu del Movement per la Democracia en Euròpa en 2025 (DIEM25, en anglés Democracy in Europe Movement 2025): es una plataforma politica paneuropèa que  sa tòca es d’arribar a mai de transparéncia, mai de democracia e mai de justícia sociala dins l’Union Europèa (UE). La vièlha politica que govèrna las institucions, segon Varoufakis es “opaca e fragmentada”, permet pas de resòlver los problèmas qu’Euròpa subís coma la crisi economica, las politicas de seguretat e de migracion. Per contra, considèra qu’ara es ora de far un esfòrç civic e paneuropèu per regenerar e democratizar l’UE e per n’evitar tant la desintegracion coma la deriva vèrs la xenofobia.
 
La prioritat iniciala de DIEM25 es la transparéncia dins las presas de decisions al nivèl europèu, amb la publicacion de las reünions del Conselh Europèu, l’Ecofin, l’Eurogrop e la Banca Centrala Europèa (BCE), en mai de las negociacions importantas coma l’acòrdi de liure escambi amb los Estats Units conegut coma TTIP o TAFTA. DIEM25 demanda tanben l’establiment d’un registrament obligatòri dels lobbys a Brussèlas (e non pas un registrament volontari coma ara).
 
Dins dos ans, DIEM25 calcula de “crear una assemblada constituenta per debatre l’aviada d’una democracia renovelada que respècte l’autogovèrn de las nacions e que partege lo poder amb los parlaments estatals, las assembladas regionalas e los conselhs municipals”. Aquela assemblada constituenta deuriá arribar en 2025 a una constitucion democratica que remplacèsse los tractats europèus actuals.
 
Lo nòu DIEM25, que s’es presentat coma una plataforma de proposicions paneuropèas a partir d’un manifèst publicat la setmana passada, nasquèt ièr de ser al teatre Volksbühne de Berlin amb la participacion d’un seissantenat d’orators e de convidats de partits e movements d’Euròpa tota.

---