Actualitats
L’Arabia Saudita crèa una vila solament per las femnas
La tòca es que cinc mila femnas trabalhen sens cap de relacion amb d’òmes
Lo regim saudita a anonciat la creacion d’una vila sonque per las femnas dins la region d’Al Hufuf. La nòva vila, que poiriá començar de foncionar l’an que ven, aculhirà d’entrepresas qu’emplegaràn qualques cinc mila femnas aperaquí. Aital se visa d’evitar que trabalhen amb d’òmes, çò qu’es enebit per las estrictas e restrictivas leis del regim saudita.
La vila per las femnas es estada l’iniciativa d’un grop d’entrepreneires qu’an capitat d’aver lo sosten del prince Mansur Bin Mitab Bin Abdulaziz. Lo prince a insistit sul fach que tota la vila es dessenhada per seguir la version integrista de la sharia, qu’es lei dins lo reialme.
L’Arabia Saudita recep de fòrtas criticas de la societat internacionala per la siá politica contra l’egalitat de las femnas. Aquò a fach que dins los darrièrs meses, ajan adoptadas qualques mesuras timidas, coma es lo cas del recent drech de vòte per las femnas dins las eleccions als conselhs assessors municipals o la possibilitat que sián vendeiras dins de botigas de perfum e de vestits de dessota, çò que lor èra enebit.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#1 Faidit, pensi que i a quicòm mai, aicí que s'ajusta a la religion, a las cresença en un diu, en una vida aprèp la mòrt o qué sabi mai. Se ditz lo "patriarcat". Las linhadas familhalas, dins las religions del libre, mas atanben en Grècia classica, dins l'empèri roman, e mai a çò dels Germanics del temps qu'èran encara politeïstas es assegurada sul nom del paire.
Per saber quala es la maire d'un dròlle, cap mistèri : cal gaitar de quin ventre estant tomba dins aquel paure mond. Per contra, qual es son paire ? Lo factor, ieu, o lo sant esperit. Tre que ven necessari de s'assegurar de l'identitat dels paires, las maires son presas verjas al maridatge, demòran a çò de son òme, dèu estar fisèla, encafornada a l’ostal, escafada sensualament per donar pas enveja fisicament d’ela a d’autres òmes, e tantas orrors autras encara… Aquò pas ligat a l’islam integrista, mas a l’integrisme patriarcal.
Dins un sistèmi matriarcal, los enfants demòran a çò de la maire, e non pas a çò del paire. Paire present, paire absent, aquò rai. Pas lo meteis paire per totes los enfants, aquò rai. La maire es lo centre de l’organizacion, e donc de la dignitat sociala. Cap problèma d’autenticitat per l’enfant se lo paire o/e la maire an partenairis sexuals multiples. Carenfin, coí èsser pas sortit del ventre de sa maire ? E mai o faguèt lo quite Jèsus ! Dins lo matriarcat, las linhadas se perenisan per las maires. Doncas, las femnas i son liuras… e los òmes tanben.
Parlam aicí amb una punta de mesprés d’unes apseèctes excessius de l’Islam. Noaustres pretendèm èsser « modèrnes », e eles serián despassats que passits. Mas, auriam romput, nosautres, a de bon, amb totas aquelas vilèhas lunas patriarcalas ? Pensi qu’aquò es sonque semblança. Darrièr lo « semblar modèrne » s’amaga sempre un patriarcat mai o mens assumit en consciéncia, mièg-conscient sonque. Aquò provòca l’orror de l’autre tre qu’el s’o mòstra ostentatòriament patriarcal. Aquela inconsciéncia es per nosautres tanben plan redobtabla. Femnas tant coma òmes, devèm demorar conscient d’aqueste sotabassament mai o mens omnipresent del nòstre eiretatge pagano-crestian mai qu’antic e sempre viu, a l’esconduda.
#2 Mon brave Pirolet, se vos interèssa de saber ont s'amaga una vila "per i metre totes los alucats de la religion", pensi que podètz anar visitar Torreciudad, en Aragon. Se sètz decebut, vos demorarà tostemps la ciutat del Vatican. Lo problèma principal es de los i far dintrar totes. Fa un fum de monde…
E una vila per i metre totes los alucats de la religion, seriá pas una bona ièa aquò? Aital daissarian lo paure monde tranquille (De veire "Las femnas de l'autobús 678" al cinemà que se lo 7n art francés a pas gran causa a nos dire lo cinemà egipcian n'a un molon).
Son completament capbords!
Qu'òm m'ane pas parlar de tolerància religiosa, culturala, politica que de qué te sabi ieu!
Aquò es l'exemple tipic de la dolentisa, conariá, incultura, cinisme, orror de la raça umana.
Paure monde !
Enfin, se ditz "cada païs sa mòda". Que se patacen se son contents atal.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari