L’existéncia de las ondas gravitacionalas dins l’espaci ven d’èsser confirmada pels scientifics del projècte LIGO, en tot assolidar la darrièra de las prediccions de la teoria de la relativitat d’Einstein, e se dobrís la pòrta a una nòva astronomia.

Cent ans après la prediccion d’Albert Einstein, la deteccion dirècta l’avián pas encara reüssida. Mas ara los scientifics del projècte LIGO an explicat dins una conferéncia de premsa a la Fondacion Nacionala de la Sciéncia (National Science Foundation), a Washington, als Estats Units, qu’an detectat dirèctament las ondas gravitacionalas a partir de la collision de dos traucs negres.
 
Aquela deteccion pòt donar mai d’informacions sus qualques fenomèns de l’Univèrs, coma per exemple la formacion dels traucs negres supermassisses e lor connexion amb la naissença de las galaxias, es a dire que poirem aver mai d’informacions sus l’istòria del còsmos.
 
Dins lo vidèo que seguís, los fisicians Umberto Cannella e Daniel Whiteson explican çò que son las ondas gravitacionalas e perqué causan d’oscillacions de la corbadura de l’espaci-temps, cossí fonciona lo detector LIGO e cossí la deteccion d’aquelas ondas tan flacas e esquivas dobrirà la pòrta a una nòva astronomia: l’astronomia gravitacionala.