Tres meses après los atemptats de París, la reforma impulsada pel president francés François Hollande per inscriure dins la Constitucion l’estat d’emergéncia e la “descasença de nacionalitat” (vòl dire: descasença de ciutadantage francés), foguèt aprovada dimècres pels deputats. Après qualques setmanas de debats passionats, la lei dicha de “proteccion de la Nacion” (vòl dire proteccion de l’estat), foguèt adoptada per l’Assemblada francesa per 317 vòtes per, 199 contra e 51 abstencions. Ara la reforma deu èsser aprovada al Senat, ont es majoritària l’oposicion de drecha, e deu èsser aprovada pels senators en tèrmes identics al tèxt votat dins l’Assemblada. E puèi encara deurà recebre lo vòte favorable de las doas cambras amassadas al Congrès, ont l’adopcion requerís l’aprobacion de cinc parts tres dels vòtes exprimits.
 
La revision consistís a apondre dins la Carta Magna de l’estat francés dos articles, un sus l’estat d’emergéncia e l’autre sus la descasença de ciutadanatge francés pels autors de crimes e delictes considerats “terroristas”.
 
Las divisions prigondas sus aqueles dos tèmas, tant dins la majoritat socialista coma dins l’oposicion de drecha, fan perdurar los dobtes sus las possibilitats que lo tèxt siá definitivament adoptat. L’èx-primièr ministre Alain Juppé, candidat favorit a las primàrias de la drecha, ataquèt fòrça durament las doas proposicions.
 
La polemica es venguda de mai en mai dura en çò que tanh a la “descasença de nacionalitat”. En genièr passat, la ministra de la justícia Christiane Taubira  demissionèt a causa de son oposicion a aquela mesura. Tanben lo ministre de l’economica Emmanuel Macron a manifestat publicament son “inconfòrt filosofic”.
 
En mai d’aquò, dins l’esquèrra creis l’ostilitat a la prolongacion de l’estat d’emergéncia, qu’autoriza las violacions de domicili amb las arrestacions a domicili e que permet d’enebir las manifestacions.

---