Dètz manifestants independentistas mòrts: es lo bilanç de la repression d’una seguida de protèstas que se debanèron dimars passat a Aba (Biafra), segon çò que rapòrta Nationalia. Los manifestants protestavan contra lo jutjament de Nnamdi Kanu, Madubugwu e David Nwawuisi, tres activistas per l’independéncia de Biafra, acusats de traïson contra l’estat nigerian e que poirián èssser condemnats a perpetuitat.
 
Las protèstas comencèron en octòbre passat après la detencion de Kanu, dirigent de l’IPOB (sigla anglesa de Pòble Indigèna de Biafra) e director de Ràdio Biafra, un mèdia illegalizat.
 
Los independentistas planhon la marginalizacion de Biafra pel govèrn nigerian, que dison que Biafra tòca pas lo profièch economic del petròli esplechat dins la region del dèlta del Nigèr, en Biafra. Lo pòble igbo es majoritàriament favorable a l’independéncia del temps que los pòbles del dèlta, mai que mai los ijaws e los ogònis, son puslèu partisans de demandar a l’estat nigerian lor pròpria autonomia.
 
Los igbos proclamèron l’independéncia de Biafra en 1967, çò que qu’arribèt a una guèrra que l’armada nigeriana la ganhèt.
 
 
Soyinka demanda de “restructurar la nacion”
 
Wole Soyinka, escrivan nigerian d’expression anglesa e Prèmi Nobel de literatura, a recomandat al president nigerian Muhammadu Buhari de parlar amb los caps igbos e de “restructurar la nacion per tal que degun vòlga pas partir”. Soyinka ditz qu’es pas estonat per las “agitacions” e soslinha que “l’idèa de Biafra” pòt pas èsser “vencuda”.
 
 
 
 
 
 

---