La sason de Superliga es plan lançada e certanas esquipas s’arregalan de desjogar los pronostics.
 

Los Dracs sens èime
 
Dissabte, los Dracs festejavan los 10 ans de lor primièra partida en Superliga. Aprèp un Els Segadors escarraunhat en comun per l’Albèrt Bueno e un cinquantenat d’escolans de la Bressola, los Catalans daissavan marcar Hull FC los primièrs, mas Richie Miller metiá sus orbita Patric Richards per l’egalizacion. Aquò se tornava repetir: ensag d’Hull, replica del novèl alièr sang e aur. E, al cap d’un vintenat de minutas, los Dracs arrestèron de jogar: palmas tombadas, manca de sosten, defensa en formatge traucat: 22-10 pels angleses a la pausa. Dins lo segond temps, levat qualques movements esporadics jamai concretizats del costat catalan, los Negre e Blanc passèron tres còps pro aisidament. Lo 38-10 del planchòt atudèt lo sosten del public (mai de 10 000 espectators) e dobriguèt la mala de las questions. Aqueste diluns de matin, lo pilar samoan Mason se ven ajustar al grop, mas pensatz que la solucion se trapariá dins la venguda d’un pilar de 36 ans?
 
La partida venenta del dissabte 27 de febrièr a Brutus se jogarà entre darrièrs del classament. Per çò que i a encara mai malaürós que los Dracs: los campions de Leeds qu’an pres un 52-16 a Widnes, que se trapa atal cap de fila al classament.
 
Dijòus, los Diables de Salford dobriguèron lo balèti en passant un espantant 44-10 a Saint Helens; divendres, Wigan se deguèt emplegar per ganhar sus la fin a Huddersfield: 18-13. E dimenge, las victòrias foguèron bèlas: 40-6 per Castleford fàcia a Wakefield e 38-8 per Warrington fàcia a Hull KR.
 
 
Rescontres internacionals
 
Aquesta dimenjada, plaça a las World Club Series amb tres partidas relevadas entre las melhoras formacions europèas e australianas: divendres, Saint Helens recebrà los Sydney Roosters; dissabte, los Broncos de Brisbane seràn sus la pelena (?) de Wigan e dimenge, afrontament per designar la melhora esquipa de la planeta tretzista entre Leeds e los Vaquièrs de North Queensland; se podètz pas anar dins lo nòrd d’Anglatèrra, poiretz seguir las partidas en dirècte sus Be In Sport.
 
Dissabte, a Brisbane, la seleccion autraliana d’NRL ganhèt una partida intensa fàcia als Indigènas: 12-8.
 
 
La pola bèla serà audenca
 
Dissabte, Lesinhan confirmèt aisidament sa tresena plaça qualificativa per la pola bèla de la segonda fasa: victòria 68-6 a Tolosa.
 
Dimenge, l’AE Carcassona esperèt las dètz darrièras minutas ont quatre ensages tornèron a la rason los volontaris Broncos de Palau: 50-33.
 
Los Dragonets ganhèron a Albi, 36-24; e Limós e Avinhon demorèron a l’ostal que la comuna de Limós aviá interdit de metre un pè sus la pelena de l’Agulha aprèp las pluèjas de dijòus e divendres. Una partida a metre dins lo calendièr mentre que la segonda fasa deu començar per la darrièra dimenjada de febrièr!
 
La pola 1 recamparà Carcassona, Limós e Lesinhan. La pola 2: Dragonets, Albi e Avinhon. La pola 3: Palau, Tolosa e Vilanuèva.
 
 
Quarts de Copa
 
Dissabte de vèspre, al Molin, l’oposicion entre Lesinhan, tenent del trofèu, e l’AE Carcassona dobrirà la tièra dels quarts de finala de la Copa. Dimenge, la formacion de Nacionala 1 Ferrals recebrà Albi; Limós esperarà Vilanuèva a l’Agulha e los Dragonets anaràn rescontrar la formacion d’Elèit 2: Carpentràs.
 
 
 
 
Alan Roch
 
 
 
 

---