Lo president francés, François Hollande, a afirmat dimars passat qu’emplegarà totes los mejans publics per afrontar la violéncia que s’es desencadenada aqueles darrièrs jorns en la vila d’Amians, causada pel malaise social que règna dins la capitala picarda.

“L’Estat mobilizarà totas las siás ressorsas per combatre aqueles actes violents”, çò diguèt lo president quant als fòrts afrontaments subrevenguts dins la nuèch de dimars passat entre la polícia e de grops de joves locals.
 
Pendent las susmautas, 16 gendarmas foguèron ferits e s’incendièt qualques bastissas publicas e qualques veïculs.
 
Davant aquela situacion, Hollande remembrèt la designacion de 15 zònas de seguretat prioritàrias (ZSPs) dins tot l’estat per combatre la violéncia, e i incluguèt los quartièrs del nòrd d’Amians, que serà una de las vilas ont se menarà mai de mejans e mai d’agents.
 
“La seguretat es pels poders publics non solament una prioritat, mas una obligacion”, soslinhèt lo president francés, en tot anonciar un refortiment de las ressorsas per las fòrças policièras dins lo budget per 2013.
 
Del sieu costat, lo ministre de l’Interior, Manuel Valls, vesitèt la vila picarda ont se debanèron los faches, aparentament motivats pel malcontentament generat per tròp de contraròtles policièrs als residents.
 
Dins l’encastre de la crisi economica de l’Eurozòna, la tension se manten nauta dins fòrça banlègas de la Republica Francesa pr’amor de las marridas perspectivas professionalas, la discriminacion raciala e la fòrta ostilitat vèrs la polícia; es a dire, los detonadors abituals de la violéncia urbana.