Mai de 30 personas serián mòrtas aqueste dimècres passat a Ankara, la capitala de Turquia, dins una explosion causada per una veitura explosiva. Demest las victimas i auriá almens 6 soldats d’un convòi militar turc que passava pel luòc de l’explosion. I auriá agut tanben mai de 60 personas feridas.
 
La deflagracion se seriá debanada sul pas d’un convòi militar que circulava pel quartièr de Cankaya, una zòna extrèmament militarizada e fòrça près del Parlament nacional turc. Tanben, plan près del luòc de l’atemptat i a un centre de l’armada aeriana turca.
 
Las autoritats turcas, engatjadas dins una guèrra dempuèi l’an passat contra los curds —tant los de l’estat turc coma los de Siria—, se son preissadas a qualificar l’atemptat d’“atac contra tota la pàtria turca”, segon los mots del primièr ministre Ahmet Davutoğlu. En mai d’aquò, dins un comunicat emés pendent las darrièras oras, lo president de Turquia, Recep Tayyip Erdoğan, a ja confirmat que lo govèrn turc “contunharà sa lucha contra las fòrças que fan aquelas atacas e que coneisson pas cap de limit moral o umanitari.” E a apondut: “Lucharem contra las fòrças que i a darrièr aquò e amb mai de determinacion cada jorn”.
 
 
Acusacions jos sospiècha
 
De son costat, un general de l’armada turca a la retirada, Erdoğan Karakuş, a soslinhat davant la CNN turca qu’aquel terrible atemptat “seriá estat pensat e elaborat plan probable pel Partit dels Trabalhadors de Curdistan” (PKK). Ça que la, los analistas internacionals an avertit que se tracta pas brica del mòde operacional dels agents del PKK en Turquia perque las milícias curdas agisson mai dins lo Curdistan turc e pas dins la capitala, Ankara, çò que fa per contra l’Estat Islamic. Aquel atemptat lo cal plaçar dins un contèxt d’atacas indiscriminadas e de masèls continús de part de l’armada turca dins de vilatges e de vilas curdas pendent los darrièrs meses e qu’an provocat de centenats de victimas.
 
Per tot aquò, e après condemnar energicament l’atemptat, lo govèrn turc s’es engatjat ara a luchar contra los curds tant dins lo territòri turc coma dins lo sirian. Es una menaça que lo PKK ja i a respondut en tot avertir que “s’es aital, Curdistan serà defendut per una coalicion de curds e d’arabis que son ja a luchar per la libertat”. Es aital qu’o a declarat lo cap dels curds sirians Salih Muslim a l’agéncia d’informacions AP, del temps que negava cap d’implicacion curda dins l’atemptat d’Ankara.
 
Totun lo govèrn e los militars turcs van pus luènh e an demandat ajuda a l’OTAN per combatre los curds. Mas cal ramentar que, dins la lucha que se desvolopa a l’ora d’ara en Siria, los curds son de fidèls aliats dels Estats Units e de l’Euròpa occidentala dins la lucha contra l’Estat Islamic.
 
Las sospièchas dels turcs se basarián sus la recenta observacion d’un suspècte qu’auriá passat la frontièra de Siria e sus las emprentas digitalas que se serián trobadas dins las rèstas de la veitura espetada dimècres a Ankara. Es un fach, totun, qu’encara deu èsser provat policièrament.
 
 
 
 
Christian Andreu/redaccion
 
 
 

---