L’Espaci Occitan Carcinòl a un besonh urgent de sosten. Aquel luòc dedicat entièrament a la lenga e a la cultura occitanas lancèt una campanha de micromecenatge sus Ulule per finançar lo loguièr de local e, doncas, sa subrevida. Mancan mens de 10 jorns per la fin de la campanha e son al 46% de reüssir. Es pr’amor d’aquò que fan una crida urgenta a la mobilizacion.
 
Inaugurat al començament de 2016 a Sant Seren (Limarga), l’Espaci Occitan Carcinòl aculhís a l’ora d’ara una librariá, una botiga de produches culturals occitans, una bibliotèca, de corses d’occitan a divèrses nivèls; e mai prevei d’aculhir de mòstras, de conferéncias, de lecturas publicas, de concèrts... Ara per ara l’Associacion Aquí l’Òc a mes en marcha lo local e n’a pagat los dos primièrs meses de loguièr.
 
Los sits coma l’Espaci Occitan Carcinòl son d’endreches indispensables per la subrevivença de la nòstra cultura. Al delà de totas las activitats que se menan per promòure la lenga, la cultura occitana a de besonh de luòcs on se pòsca parlar la lenga e ont la cultura del país aja una plaça per s’exibir sens cap de complèxe. Cal d’endreches ont l’occitanitat se pòsca viure plenament e ont siá possible de far un usatge social e normal de la lenga occitana sens que degun se sentisca estrangièr dins lo país.
 
Sant Seren es una vila fòrça importanta per servar la cultura. La vila de l’escrivan Pèire Brayac aculhís l’associacion Aquí l’Òc, la Calandreta l’Esquiròl, de corses d’occitan per adultes e mai a de classas d’occitan dins doas escòlas publicas, un collègi e un licèu e sèrva de nombroses locutors qu’an popat la lenga al brèç.
 
 
Serada de sosten
 
Divendres 23 de febrièr, se i organiza una serada de sosten amb la contaira Monique Burg e amb de musica tradicionala. Per i participar cal reservar al +33 (0)6 73 62 64 63 o per e-mail a aquiloc@....
 
 
 
 
Ferriòl Macip
 
 

---