An mes en libertat Albert Woodfox, un òme qu’a passat 43 ans en preson dins una cellula d’isolament, de 5 mètres cairats, practicament sens cap de contacte uman. Woodfox foguèt empresonat quand aviá 26 ans, ara n’a 69. Èra acusat de l’assassinat de Bren Miller, un susvelhant de preson en 1972, mas el a totjorn negat aquel crime.
 
Woodfox es conegut coma un dels “Tres d’Angòla” (en anglés The Angola Three). Los tres plaçats a l’isolament, a causa de la mòrt de Miller, dins la preson d’Estat de Loïsiana (Estats Units), tanben coneguda jos lo nom d’Angòla. Woodfox deviá encara èsser jutjat un tresen còp, amb los autres dos, mas ara lo ministèri public e los avocats an pachat l’acceptacion d’una acusacion mendre d’omicidi. Los autres dos foguèron liberats en 2001 e 2013.
 
Woodfox a acceptat aquela acusacion per tal d’èsser liberat a causa de son edat e de sa santat. Pasmens, el afirma qu’es innocent e que la rason de son embarrament es son activisme politic coma membre de l’organizacion afroamericana de las Pantèras Negras, en favor dels dreches de la populacion afroamericana.
 
Woodfox èra dins la preson de Loïsiana quand se tuèt Bren Miller. Dins aquel temps èra acusat per un delicte de bracatge. Segon el, l’acusèron en fals de la mòrt del susvelhant per aver denonciat la segregacion dels negres dins las presons estatsunidencas. Ara es sortit de la preson en levant lo ponh.
 
Dins los quatre decennis que Woodfox a passat a l’isolament, a pas pogut assistir a las funeralhas de sa maire nimai de sa sòrre. Ara, ditz que la primièra causa que vòl far es d’anar al cementèri per lor dire adieu.
 
L’afar Woodfox a generat de nombrosas mobilizacions de defensors dels dreches umans, dont Amnestia Internacionala.