Lo president de Turquia, Recep Tayyip Erdoğan, a declarat que lo sieu país a drech a menar d’operacions contra los terroristas en defòra de sas frontièras, çò rapòra lo jornal Hürriyet. “Turquia a drech tot plen de realizar d’operacions en Siria e dins los luòcs [a l’estrange] ont opèran los grops terroristas, pr’amor qu’aquò fa partida de la lucha contra las menaças qu’afrontam”, çò a afirmat.
 
Lo cap turc a apondut qu’en menar aquel tipe d’operacions, “se pòt pas parlar de violacion de la sobeiranetat dels estats que pòdon pas garentir d’un biais independent lor integritat territoriala”. Cèrtas, es una interpretacion tras que personala de l’expansionisme turc, ni prevista, ni reconeguda dins cap de tractat internacional. Las accions militaras en defòra de sas frontièras pròprias son d’agressions contra un autre estat segon tota la doctrina juridica internacionala.
 
Mentretant, Turquia contunha d’atacar lo nòrd de Siria. Lo 15 de febrièr l’armada turca lancèt d’obuses contra de posicions curdas en Siria dempuèi la basa militara d’Akcabar: aquela accion Ankara la definiguèt coma una responsa a un atac contra un luòc de seguretat dins la frontièras qualques oras abans.
 
 
 
 

---

Aqueste article es adaptat de Geopolítica.cat amb qui Jornalet a un acòrdi de cooperacion.