Jornalet vos aviá parlat d’una seguida d’agressions racistas a Marselha. Ansin, Tzion Saadoun, professor d’istòria al Licèu Yavné, a Marselha, dins lo tretzen arredondiment, aviá denonciada una agression contra el que s’èra passada per carrièras. D’efièch, de nèrvis, armats de dos cotèls, l’avián chapotat al braç, a la camba e, segon nòstres confraires de La Provence, al ventre, lo 18 de novembre passat. Segon çò que diguèt lo professor, los agressors, que serián tres, èran arribats sus un escotèr e s’èran arrestats a la nautor de l’ensenhaire, que portava una quipà. Los nèrvis l’avián insultat, li avián mostrada una camiseta de l’Estat Islamic e avián arborat sul telefòn mobil una fòto de Mohamed Merah, abans de fugir.

Pasmens, segon lo meteis jornal, l’agression sembla de mancar de pròvas: identifiquèron pas jamai los nèrvis, Sénher Saadoun passèt solament una nuèch a l’espital e las nafraduras denonciadas serián estadas “ridiculas” e contradirián los examens medicolegals.

Per tant, ièr de matin, convoquèron lo professor d’istòria a l’Evescat, çò es l’ostal de polícia de Marselha, e lo placèron en gàrdia a vista dins l’encastre d’una enquista sus una possibla denóncia messorguièra. Uèi de matin, lo procuraire de Marselha, Brice Robin, que parla de probabla automutilacion dins un comunicat, a anonciat que Sénher Saadoun seriá jutjat en abril.