Entre l’11 de genièr e lo 12 de febrièr passats, l’illa chinesa d’Hainan aculhiguèt la primièra Universitat d’Esperanto del mond. Lo projècte es basat sus la cooperacion dels professors, e per aquò se faguèt un apèl a la participacion volontària. Se cerquèt de doctors esperantofòns que foguèsson ja estats de professors universitaris.

Acabadas las classas presencialas, se contunha de trabalhar per que lo plan d’estudis siá ambiciós e complet. S’impartiguèt qualques 50 oras de classa per matèria, que foguèron filmadas, e son a las cargar sus Internet amb licéncia Creative Commons per qu’òm las pòsca seguir dins lo Mond entièr. D’autras universitats de prestigi, coma l’Universitat de Yale o la de Berkely, aplican ja de sistèmas similars.
 
Una de las idèas mai considerablas es lo fach que l’Universitat d’Esperanto impartís las leiçons dins aquela lenga internacionala nèutra, mas solament coma lenga veïculara. Aital las matèrias impartidas son pas sus l’esperanto mas sus las divèrsas sciéncias e arts. Amb aquela mesura, se vòl normalizar aquela lenga e ne far un usatge abitual, en evitant que l’Universitat d’Esperanto siá un eveniment sus l’esperanto o sus l’esperantologia. I a solament un cors de metodologia lingüistica, coma dins totas las universitats del mond.