Qualques desenats de milièrs de russes manifestèron dimenge passat per remembrar lo primièr anniversari de l’assassinat de Boris Nemtsov, lo politician opausant al govèrn de Putin, que foguèt fusilhat arunan près del Cremlin.

Las manifestacions pacificas convocadas a la memòria del politician liberal venguèron clarament de protèstas contra Vladimir Putin, quand manca sièis meses per las eleccions parlamentàrias. Se debanèron a Moscòu, a Sant Petersborg e dins d’autras vilas de la Russia europèa e tanben de Sibèria.

L’oposicion extraparlamentària tornèt acusar Putin de crear lo clima d’òdi que menèt a la mòrt de Nemtsov, considerat lo crime politic amb mai de resson de l'istòria russa dempuèi la fin de l’URSS fa 25 ans.


Fusilhat près del Cremlin

Lo veteran politic Boris Nemtzov foguèt tuat lo 27 de febrièr de 2015 a Moscòu. Aviá 55 ans. Segon las autoritats russas, Nemtzov, qu’anava acompanhat d’una femna, recebèt quatre balas sus l’esquina, qu’avián tirat d’una auto blanca quand passava pel Grand Pont de Pèira de la capitala russa, près del Cremlin.
 
Nemtzov, que èra estat viceprimièr ministre pendent l'epòca de Boris Ieltzin, aviá apelat a una “Marcha de la Prima de l'1 de Març” contra la guèrra en Ucraïna.

Una partida de l’oposicion exigís l’arrèst de la politica d’ingeréncias al país vesin.