La polícia francesa comencèt diluns d’expulsar de personas del camp de migrants e de refugiats de Calais, conegut coma “la Jungla”. Los policièrs intervenguèron amb duretat contra lo mond qu’ensajavan d’empedir lo deslotjament. Segon las organizacions umanitàrias qu’èran sus plaça, en seguida se menèt a bon tèrme una demolicion violenta de las tendas e las barracas e sul pic espetèron de susmautas. Al ser, de grops de refugiats ensagèron d’assautar qualques unes des camions que fan la rota del tunèl, vèrs lo Reialme Unit.
 
Lo tribunal administratiu de Lilla aviá autorizat dijòus passat lo desmantelament del camp en refusant lo recors presentat per divèrsas associacions prò-dreches umans. La mesura es estada impulsada pel govèrn francés amb l’argument que las condicions del campament èran insalubras e perilhosas. Aquesta setmana, qualques organizacions d’ajuda umanitàrias an ensajat d’empedir lo deslotjament mejançant de protèstas e d’accions.
 
Lo govèrn cèrca de transportar entre 800 e 1000 migrants vèrs de centres d’albergament dins divèrsas vilas de l’estat francés. Mas, segon las associacions, “es una violacion dels dreches fondamentals dels migrants”. Los activistas asseguran que “las solucions prepausadas son absoludament pas adaptadas a lors besonhs” e reclaman que los refugiats pòscan “demorar aicí fins que se tròbe d’autras solucions”.