L’Acadèmia de Tolosa a suprimit lo pòst de conselhièr pedagogic d’occitan del departament d’Òlt, çò raportava ièr La Setmana. L’argument d’aquela supression es lo taus naut d’enquadrament entre ensenhaires e conselhièrs pedagogics. Lo departament d’Òlt a un conselhièr per 52 ensenhaires del temps que tot lo territòri administrat per l’Acadèmia de Tolosa n’a un per 75 ensenhaires e que tot l’estat francés a un taus d’un conselhièr per 85 ensenhaires. Es doncas per s’aprochar dels tausses mejans exagonals qu’an decidit de sacrificar lo conselhièr pedagogic d’occitan.
 
Ara la gestion tecnica de l’ensenhament de l’occitan dins las escòlas publicas d’aquela partida de Carcin serà fisada a un inspector departamental e a una conselhièra pedagogica en lengas, segon un corrièr que lo mandèt la rectritz de Tolosa als sindicats dels personals de l’Educacion nacionala francesa. Lo departament d’Òlt dispausarà totjorn de dos ensenhaires-animators e d’un mèstre-formator. Pasmens, aquel mèstre-formator es un ensenhaire de l’escòla bilingua de Gramat, qu’a pas las atribucions d’un conselhièr pedagogic, çò precisa La Setmana.
 
“Èsser conselhièr pedagogic dins un departament rural coma Òlt significa que cal far de quilomètres. La densitat de populacion d’aquel parçan carcinòl es d’a penas 33 estatjants al quilomètre carrat. D’un ponch de vista demografic, la populacion vielhís e demòra mendre”, çò explica lo sit d’informacions del setmanièr occitan, qu’explica que d’autres pòstes de conselhièrs pedagogics, coma lo de musica o lo d’arts plastics , poirián desaparéisser l’an que ven.