Es caps deth projecte Pyroslife an decidit de liberar un aute ors brun enes Pirenèus eth mes de mai d’enguan. Damb açò vòlen sauvar era diversitat genetica dera espécia e dilhèu aumplir un ued que poirie deishar er ors Pyros, ja vielh.
 
Pyroslife vò atau finir es problemes de consanguinitat dera espécia, segon çò que confirmèc Ferran Miralles, director generau de politiques environamentaus dera Generalitat de Catalonha ara agéncia d’informacions ACN. Compde tengut qu’er ors Pyros ei estat eth solet mascle qu’a pogut demorar en aqueres montanhes pendent mès de 20 ans, cau cambiar eth sòn eretatge genètic s’òm vò sauvar era espécia en aqueres montanhes.
 
Per açò, divèrsi tecnicians de Pyroslife decidirèn enes setmanes que vien quin a d’èster eth melhor lòc entà liberar eth navèth ors. Tanben, e segon era Direccion Generau de Politiques Environamentaus, que calerà aver complicitat damb es elevaires e pagesi entà hèr qu’eth projecte sigue ua escaduda, çò confirmèren ara ACN hònts d’aqueth organisme.
 
“Es elevaires son un des sectors mès reticenti ara preséncia d’orsi enes Pirinèus e ara cau cercar es melhores solucions entara proteccion des oelhes que poden èster atacades, des cans o tanben des cabanes des pastors”, çò diguec Ferran Miralles .
 
 
Un ors qu’ei ja vielh
 
Eth problema ère qu’er ors Pyros ei vengut plan ben dempús era sua liberacion enes Pirinèus pendent mès de 19 ans —que siguec liberat en 1997—. E ei estat eth solet mascle qu’a pogut demorar en un airau de mès de 5000 km2 pr’amor qu’er ors que liberèren hè mès de 10 ans, er ors Balú, moriguèc lèu per un pericle queigut e non poguec aver cap de hilh. Ara Pyros ei ja vielh e se pense que lèu non se poderà arreprodusir mès.
 
Totun, Pyros qu’a deishat un bon eretatge pr’amor que mès deth 75% des orsi neishudi enes Pirinèus pendent aguesti ans son es sòns hilhs e hilhes. Ath delà, toti es que son neishudi pendent es darrers cinc ans son toti hilhs sòns. Ça que la, Pyros a ja 26 ans e non se sap dambc certitud se guairi ans demorarà viu.
 
 
 
 
Christian Andreu