En responsa als darrièrs movements faches pel govèrn chinés dins las islas de la Mar de la China Meridionala, Austràlia a anonciat que comença un programa de militarizacion per melhorar la defensa d’aquel continent. Aital o declarèt lo primièr ministre australian, Malcolm Turnbull.
 
Aquel programa de militarizacion, plan inusual dins un país coma Austràlia, serà lo mai grand creissement del budget militar d’aquel país dempuèi la Segonda Guèrra Mondiala. Austràlia a decidit de crompar 12 nous sosmarins, 12 vaissèls de patrolhatge e nòu fregatas antisosmarinas qu’integraràn la flòta australiana pendent los ans a venir.
 
En mai d’aquò, lo govèrn australian engatjarà 5000 militars nòus e farà créisser d’un 2% lo budget militar australian d’ara fins en 2021. Tot aquò en responsa a la demanda estatsunidenca d’aver mai de responsabilitats dins la granda region Asia-Pacific.
 
Totun, la marina australiana contunharà d’èsser fòrça petita per rapòrt a d’autres païses vesins mas la crompa de novas unitats militaras farà considerar lo ròtle que lo jòga dins la region coma mai fòrt. Se foguèsse aital, seriá la marina mai granda de la region al sud de Japon. E aquò es un senhal per totes los sieus vesins, mas especialament un.
 
 
Chepic per las manòbras chinesas
 
Los analistas considèran que los estatsunidencs, amb la preséncia de la setena flòta dins la region, encara seràn la poténcia militara mai granda fins en 2035. Mas tanben avertisson que China aurà un ròtle de mai en mai grand tre ongan.
 
E mai se los australians an de relacions economicas plan bonas amb los chineses, aquela creissença militara l’an volguda far sens importunar China pr’amor que sos investiments dins las minas australianas son fòrça grands. Mas las recentas reclamacions de territòris dins la Mar de la China Meridionala son estadas consideradas pel Govèrn australian “amb preocupacion per una escalada militara dins la region qu’a pas cap de precedent”.
 
L’allusion es clara. China a demandat recentament que mai de 12 000 km² de tèrra en diversas illas d’aquela mar sián ara sieus. E a bastit d’illas artificialas per i installar d’esquipament aerian e militar nòu. Segon lo Pentagòn, China auriá installat dins la region de defensas militaras amb de radars, d’aeropòrts e d’avions militars e tanben de missils sòl-aire.
 
“E mai se la marina australiana es encara petita, es fòrça ben considerada per l’utilizacion de la nauta tecnologia. Pr’aquò aquela creissença del budget militar es ambiciosa mas es sustot rasonabla”, çò diguèt Peter Jennings, director executiu del Institut de Politica Estrategica Australiana a Canberra.
 
Amb aquò, se pensa que lo govèrn dels Estats Units serà satisfach. E tanben se pensa que, uèi, aquò provocarà pas de problèmas dins las relacions entre China e Austràlia. Mas es tanben un senhal fòrt qu’Austràlia vòl mandar als chineses. La crompa de 12 nòus sosmarins e nòus avions F-35 es un senhal clar que Pequin lo pòt pas mancar de veire.
 
“La decision de crompar divèrses avions militars F-35 de cinquena generacion al govèrn dels Estats Units es un senhal clar. La crompa de sosmarins a Japon se pòt interpretar coma un senhal fòrt que los australians fan a la poténcia militara mai granda de la region, China”, çò confirmèt Michael Green, vicepresident del Centre d’Estudis Estrategics Asians, a Washington.
 
Al delà d’aquò, los movements que fa l’ASEAN, çò es l’aliança militara occidentala dins la region ( Estats Units-Japon e Austràlia entre d’autres ), son estats lèu faches. Dempuèi la crisi dels missils entre China, Japon, Vietnam e Filipinas, la situacion es clara: lo Pacific se militariza e o fa lèu.
 
 
 
 
Christian Andreu