Lo director anglés Stephen Daldry (Billy Elliot, The reader) realizèt l'an passat lo siu filme mai perpensat e mai emocionant de sa carrièra, en s'inspirar del roman eponim de l'american Jonathan Safran Foer.



Lo filme seguís una lesca de vida del jove nòvayorkés Oskar Schell, 11 ans, la lesca mai dura e dolorosa, ja que son papà defuntèt dins las torres bessonas, sens jamai que lo sieu còs se poguèsse trapar.

Mainatge superiorament intelligent e desgordit, lo jove Oskar ensaja ribon-ribanha de far lo dòl d'un paire extraordinari partit tròp lèu. S'embarra dins la dolor e los questionaments fins al jorn que descobrís, dins un armari, una clau daissada per son paire. La siá vida n'es tremolejada.

Dintra dins la pèl d'un enquestaire: metodicament, scientificament, atal coma son papà l'o ensenhèt, l'orfanèl percorrirà las carrièras d'una Nòva York venguda immensa en quèsta del misteriós proprietari de la clau. De qué o qui traparà? Quinas responsas trobarà? Qui rescontrarà?
 
Sens jamai caire dins l'indeïscéncia, lo filme, per una succession de matises, amb una gramatica cinematografica perfaita, una tecnica totalement mestrejada e sustot unes actors fantastics, nos fa dintrar dins la fragilitat de l'univèrs de l'enfància que fa plaça al mond adult, de la vida que s'acròca fàcia la mòrt.

Lo jove Thomas Horn que jòga lo ròtle del gojat Oskar Schell es tresvirant d'emocion e de sinceritat.

Segur que ne tornarem ausir parlar, ja que lo cinèma mondial daissarà pas partir un actor tant acomplit, qu'instinctivament sap parlar a las tripas, al còr e a la garganta dels espectators. Emocionants tanben son na Sandra Bullock, dins lo ròtle de la maire, e en Tom Hanks que jòga lo papà desaparegut e fantasmagoric. Caldrà ajustar l'aportacion segura de l'aujòl Max von Sydow. 


Extrèmament fòrt e incrediblament prèp es un filme iniciatic, del passatge del mond dels pichons cap al mon dels grands, de la reconquista per un mainatge de la siá enfància panada. Es al cinèma çò que lo libre de J.D. Salinger, The catcher in the Rhye, es a la literarura: un joièl.


Es un cap d'òbra pur que cal descobrir o tornar descobrir a l'escasença de la sortida ja fa qualques jorns de las edicions espanhòlas e francesas en DVD e Blu-ray (edicion italiana prevista per setembre) d'aqueste filme.







Terric Lausa

 


_____
EXTRÈMAMENT FÒRT E INCREDIBLAMENT PRÈP (Extremely Loud and Incredibly Close)
Director: Stephen Daldry
Actors: Thomas Horn, Sandra Bullock, Tom Hanks, Max von Sydow. Warner Bros – USA – 129 mn
Sortida als USA: 25/12/2011