L’acòrdi de l’UE amb Turquia es illegal, çò o anoncièt ièr l’ÒNU, e las principalas organizacions umanitàrias internacionalas, qu’afirman que viòla almens cinc legislacions suls dreches dels refugiats e de leis internacionalas e europèas, dont la Declaracion Internacionala dels Dreches Umans e las Convencions de Genèva de 1949.
 
Lo director del Naut Comissariat de las Nacions Unidas pels Refugiats (NACNUR) remarca que malgrat l’acòrdi de l’UE amb Turquia, “los refugiats cercaràn d'autras vias per arribar sul vièlh continent” e espèra que dins los jorns avenidors “se garentisca que se prendràn en compte las demandas d’asil”.
 
 
L'UE expulsarà vèrs Turquia totes los refugiats qu'arriben en Grècia
 
L'Union Europèa expulsarà vèrs Turquia totas las personas qu'arriben en Grècia de manièra irregulara, los demandaires d’asil incluses, segon lo principi d’acòrdi que i son arribats los caps dels 28 estats de l’UE amb lo govèrn turc. Dins una longa reünion a Brussèlas, los caps d’estat e de govèrn de l'UE se son engatjats a pagar mai d’argent a Ankara e a liberalizar los visats pels ciutadans turcs; en contrapartida, lo govèrn d’Ahmet Davutoğlu acceptarà lo retorn sus son territòri de totas las personas qu’arriben “irregularament” en Grècia, e mai se son de refugiats de guèrra. Lo principi d’acòrdi se detalharà dins los jorns venents e se ratificarà durant la reünion dels 17 e 18 de març que venon.
 
Los caps europèus an acceptat las condicions que prepausava Turquia per arrestar la crisi dels refugiats, e mai se son pas encara arribats a un acòrdi final.
 
Lo govèrn de Davutoğlu a exigit de duplicar lo 3 miliards d’èuros qu’ofrissiá Brussèlas, segon an confirmat lo president de l’Eurocambra, Martin Schulz, e la cancelièra alemanda, Angela Merkel.
 
L'UE s’es tanplan engatjada a preparar lo camin per accelerar l’adesion de Turquia a l’Union.