Dimars passat 8 de març, en escasença del jorn per l’egalitat dels genres, se tornèt metre en marcha en Afganistan Radio Shaesta. Amb lo sèti a Kunduz, fa d’emissions per tot lo nòrd del país, e sa programacion, adreiçada a las femnas, critica amb duretat las violacions constantas de lors dreches.
 
La ràdio èra barrada dempuèi mièg an, coma consequéncia d’un atac dels talibans que contrarotlèron Kunduz pendent tres jorns. La fondatritz e directritz, Zarghona Hassan, e las salariadas de la ràdio fugiguèron sul pic perque ja sabián qu’èran elas las principalas tòcas de l’atac integrista. Ara an pogut tornar e an tornat metre la ràdio en marcha.
 
En Afganistan, la ràdio es un mèdia important pr’amor qu’aperaquí la mitat de la populacion sap pas legir e es fòrça escampilhada geograficament. Per tant, las emissions radiofonicas son fòrça escotadas.

fffff		fffff
	La lucha de las femnas en Afganistan   L’Associacion Revolucionària de las Femnas d’Afganistan (RAWA segon sa sigla en anglés) es una organizacion afgana que lucha pels dreches de las femnas e per una societat laïca e democratica.   RAWA se definís coma una organizacion sociala e politica independenta de femnas afganas, e mai se compta amb mantes militants òmes, e sa tòca es la participacion de las femnas afganas a las activitats politicas e socialas del país, e aténher un regim democratic, dobèrt a l’egalitat de genre. Son tanben pel desarmament e la fin de la guèrra que patís lo país dempuèi longtemps.   La fondèt l’estudianta activista Meena Keshwar Kamal en 1977. Dètz ans puèi la tuèron per sas activitats politicas.   Tre alavetz los activistas de RAWA an luchat contra los regims pròsovietic, mujahidin e taliban qu’an governat lo país successivament, e a l’ora d’ara se mòstran fòrça critics amb l’actuala ocupacion estatsunidenca.