La fòrça aeriana de Turquia ataquèt ièr qualques posicions curdas dins l’estat iraquian, segon çò que raporta l’agéncia turca d’informacions Anadolu. En mai d’aquò, an detengut un trentenat de personas en una operacion contra lo PKK. Las autoritats turcas justifican l’atac e las detencions coma responsa de l’atemptat que dimenge de ser tuèt 37 personas e ne feriguèt 125 al centre d’Ankara. S’agís del segond massacre al còr de la capitala curda en mens d’un mes. L’atemptat precedent foguèt revendicat per un grop armat curd nomenat Falcons de la Libertat de Curdistan (TAK).
 
Après l'atemptat de dimenge a Ankara s'establiguèt un vèto informatiu. Un jutge enebiguèt la difusion de quin tipe d’informacion que siá, mai que mai sus Facebook e sus Twitter. Lo president del país, Recep Tayyip Erdoğan, diguèt dins un comunicat que l’atac èra una temptativa per devesir Turquia e avertiguèt que renonciarián pas a son drech a la legitima defensa contra la menaça terrorista. L’OTAN e l’Union Europèa manifestèron sa solidaritat amb Turquia, ont se viu dempuèi qualques meses en estat d’alèrta maximala.
 
Lo govèrn turc soslinha que los atemptats son l'òbra del Partit dels Trabalhadors de Curdistan (PKK) e per tant l'aviacion militara turca efectua de multiples atacs contra los curds, tant dins l’estat turc coma dins l’estat sirian o iraquian.
 
Las ostilitats entre l’estat turc e lo PKK reprenguèron en julhet. Lo PKK decidiguèt de metre fin a la trèva unilaterala declarada fa mai de dos ans, après d’atacs de l’armada turca contra de posicions curdas. Lo PKK considerèt que l’estat turc voliá pas avançar dins las negociacions, e mai qu’agredissiá, e que fasiá pas res per evitar las agressions contra los curds, en tot profechar del conflicte en Siria e Iraq.