Vint e uèch ans après lo masèl amb d’armas quimicas dins la vila curda d’Halabja, dos cent delegats politics e socials de las tres regions autonòmas de majoritat curda del nòrd de Siria s’amassèron ièr dijòus per avançar cap a un nòu sistèma de govèrn federal aplicable al Curdistan Occidental, tanben nomenat Rojava. S'agís de far un pas endavant vèrs l’autonomia e lo confederalisme democratic que s’i implantèt fa dos ans. De membres de las comunautats curdas, aràbia, assiriana, siriana, turcmèna, armènia, circassiana e chechena, en mai del movement feminista e de fòrças politicas coma lo Partit de l'Union Democratica, lo Movement de la Societat Democratica e las Fòrças Democraticas Sirianas, an previst d’anonciar una Federacion del Nòrd de Siria, amb un sistèma federal qu’alargue l’estructura d’autogovèrn que los curds e la rèsta dels pòbles de la zòna an formada aqueles darrièrs ans.
 
“Plan lèu las institucions d’autogovèrn de las tres regions curdas dins lo nòrd de Siria declararàn la creacion d’una federacion”, çò afirmava lo representant del PYD, Abd Salam Ali. Lo nòu sistèma politic federal, consent amb las linhas mèstras del confederalisme democratic, vòl promòure la representacion e la coexisténcia de totes los grops etnics e religioses del nòrd de Siria.
 
Coma lo movement politic curd en Turquia, en Rojava espèran que tanben son experiéncia se pòsca aplicar puèi a la rèsta de pòbles e de comunautats religiosas de Siria: “Nòstra experiéncia poiriá èsser utila als alauitas e sunnitas. Es benlèu la clau per portar la patz dins lo país”, çò diguèt Abd Salam Ali.

---

De legir: Rojava: lo confederalisme democratic e la revolucion de las femnas