Dimècres passat, 16 de març, en ocasion del 772 anniversari de la desbranda de Montsegur, publicàvem un article commemoratiu a l’encòp a l’encòp en occitan sus Jornalet e en espanhòl sul sit del roman Òc. Mentretant, sus plaça, un cinquantenat de personas se recampavan jos la tempèsta de nèu per far onor e memòria a las victimas de la guèrra de 1209-1244, quand l’armada francesa, amb lo sosten del Vatican, envasiguèt una partida d’Occitània jol pretèxt de combatre una eretgia religiosa.
 
Se legiguèt lo nom de las 120 personas identificadas, demest las 210 que foguèron cremadas dins lo lenhièr al Prat dels Cremats de Montsegur. Seguiguèt la presa de las paraulas, dont Joan-Francés Laffont insistitguèt sus la possibilitat istorica de metre lo nom d’Occitània dins una carta politica, amb la nòva division reginoala. A la fin, los recampats cantèron l’imne d’Occitània.
 
Lo 16 de març de 1244, de matin, l’armada francesa cremèt 210 personas dins un grand lenhièr. Uèi, al Prat dels Cremats, i a una estèla commemorativa dedicada a aquelas victimas: “Als catars, als martirs del pur amor crestian”.
 
 
Tornarmai dimenge que ven
 
Dimenge 20 de març que ven, a 11 oras, aurà luòc al Prat dels Cremats, al pè del Castèl de Montsegur (País d’Òlmes), i aurà una autra commemoracion de remembre, organizad per Occitània e Libertat.
 
A l’ora d’ara, lo 16 de de març es pas oficialament un jorn festiu, e per tant l’associacion foissenca Occitània e Libertat suggerís la commemoracion lo dimenge seguent, qu’es lo 20 de març. Se prepausa “una ceremònia de reculhiment, dobèrta a totes”, per “tornar trobar d’espacis de libertat, de pensada, de reflexion; luènh dels unifòrmes constrenches”. Pasmens, lo quite 16 de març, dimècres, i aurà de mond sus plaça per far de memòria istorica.
 
 
Protèsta contra de projèctes d’amainatjament
 
La commemoracion d’ongan es marcada per la protèsta contra cèrts projèctes d’amainatjament del sit. Occitània e Libertat es a amassar de signaturas per demandar que se bastisca pas de construccions ni mai que se faga pagar per accedir al Prat dels Cremats.
 
Lo projècte previst per la comuna amb lo sosten de la region se nomena Montsegur 2020 e prevei de bastir un bastiment d’aculhença al pè del castèl, amb d’informacions, de lavabòs, un portanèl... e la creacion d’un musèu nòu. Son còst es estimat a 586 000 èuros e cèrca d’obténer lo labèl “grand site de France” (grand sit de França).
 
Mas Occitània e Libertat refusa que l’endrech istoric siá tractat coma un pargue tematic o un complèxe toristic. “Montsegur es un santuari e tanben un cementèri. La tragèdia que s'i debanèt cogís de nòstra part memòria, respècte e umilitat”, çò afirma lo collectiu, que demanda que “tota construccion, se se deu bastir, demòre invisibla dins la perspectiva actuala del sit” e que “l'accès al Prat dels Cremats e al monument demòre liure e a gratis per totes, e aquò lo sant clame de l'an”.
 
“Degun comprendriá pas que calguèsse pagar per accedir als monuments als mòrts de nòstras vilas e als cementèris”, çò precisa Occitània e Libertat.