Lo Reialme Unit nèga lo salconduch al fondador de Wikileaks, que pòt èsser arrestat e extradit se quita l’ambaissada eqüatoriana. Lo parlament eqüatorian demanda al govèrn de Rafael Correa que sollicite una reünion del Conselh de Seguretat de l’ÒNU.

Tension de las grandas entre lo govèrn britanic e lo govèrn eqüatorian per l’asil del fondador de Wikileaks, Julian Assange. L’Eqüator anoncièt dijòus passat qu’acceptava la demanda d’asil politic perque estima que los dreches d’Assange son en perilh. Mas lo govèrn britanic a negat lo salconduch amb lo qual Assange poiriá quitar l’ambaissada eqüatoriana a Londres, ont se refugièt en junh, e lo meteis govèrn britanic insistís per extradir Assange en Suècia ont es acusat de delictes sexuals.
 
Après l’anonci del govèrn de l’Eqüator, lo ministre britanic dels Afars Estrangièrs, William Hague, diguèt que lo sieu govèrn aprovariá pas lo salconduch per qu’Assange poguèsse anar fins a l’Eqüator, de sòrta qu’Assange pòt èsser arrestat just en sortissent de l’ambaissada.
 
Dijòus passat, lo govèrn britanic menacèt d’assautar l’ambaissada eqüatoriana amb l’argument qu’aviá el “l’obligacion legala” de liurar Assange a Suècia, e l’entornegèt de policièrs, qu’an ja fach qualques arrestacions.
 
 
“Un atac contra lo drech sobeiran de l’Eqüator”
 
Lo ministre eqüatorian dels Afars Estrangièrs reïterèt que podián pas permetre que lo procès per l’afar Assange entreboliguèsse las relacions diplomaticas amb lo govèrn britanic, mas critiquèt durament lo govèrn britanic per aver dich que i aviá la “basa legala per que lo Reialme Unit arrestèsse Assange dins l’ambaissada eqüatoriana”. Per l’Eqüator, aquò es “un atac clar e ofensiu contra lo drech sobeiran de l’Eqüator... Cap de lei estatala pòt pas justificar una accion intrusiva dins los espacis diplomatics, enluòc al Mond. Es un precedent perilhós.” De mai, lo ministre dels Afars Estrangièrs tornèt dire que l’Eqüator es “un estat liure, sobeiran e democratic, non subjècte a cap de tipe de tutèla extèrna, que respècta lo drech internacional e que defend de manièra indubitabla lo dialòg”.
 
A l’ora d’ara, se sap pas çò que se pòt passar, mas Wikileaks a anonciat per mejan de Twitter qu’Assange parlariá dimenge als mèdias, de la pòrta de l’ambaissada estant, just quand farà dos meses que i intrèt per demandar l’asil.
 
 
Demanda de reünion urgenta al Conselh de Seguretat de l’ÒNU
 
L’Assemblada de l’Eqüator a aprovat, per setanta tres vòtes en favor e sèt abstencions, una declaracion de refús de las menaças del govèrn britanic contra l’eqüatorian per la decision d’autrejar l’asil politic al fondador de Wikileaks. “Lo plen de l’Assemblada Nacionala [de l’Eqüator] condemna e refusa las menaças d’usatge de la fòrça del govèrn de la Grand Bretanha, per pretendre de far irrupcion dins l’ambaissada de l’Eqüator a Londres, perque constituiriá un atemptat a la sobeiranetat nacionala e una violacion dels principis del drech internacional consagrats dins la Carta de las Nacions Unidas”, çò ditz lo comunicat del parlament eqüatorian.
 
Lo parlament a recomandat tanben a l’executiu que demande una reünion urgenta del Conselh de Seguretat de l’ÒNU per evitar que la Grand Bretanha complisca la menaça.
 
Lo plen merceja atanben “totas las iniciativas diplomaticas de sosten” qu’a recebut lo govèrn de Rafael Correa, dont las de l’Aliança Bolivariana pels Pòbles de Nòstra America (ALBA), l’Union de las Nacions Sud-Americanas (UNASUR) e l’Organizacion dels Estats Americans (OEA).
 
 
“Assange auriá pas un jutjament just als Estats Units”
 
L’Eqüator a pas recebut cap de garentida qu’Assange seriá pas extradit en un tresen país; doncas, considèra que i a “una evidéncia juridica que demòstra qu’Assange auriá pas cap de jutjament just als Estats Units”. Per aquelas rasons, entre d’autras, lo govèrn eqüatorian a acceptat la demanda d’Assange. Aital o expliquèt dijòus passat lo ministre dels Afars Estrangièrs, Ricardo Patiño, que remembrèt tanben que la demanda d’asil d’Assange se basava sus la “temor d’una persecucion politica de part d’un tresen estat per la siá defensa en favor de la libertat d’expression e de premsa”. L’Eqüator considèra qu’Assange subiriá de represalhas, amb un perilh per la siá integritat fisica e la siá vida. “I a la certesa que lo pòdon extradir en un tresen país en defòra de l’Union Europèa, e i a de pròvas qu’Assange auriá pas un jutjament just als Estats Units: poiriá èsser jutjat per un tribunal especial o militar e èsser condemnat a perpetuitat o a la pena capitala”. Fin finala, Patiño remembrèt que “l’asil es un drech uman fondamental que crèa d’obligacions a totes los estats”.
 
 
Assange merceja lo coratge de l’Eqüator
 
Julian Assange mercegèt lo coratge del govèrn de l’Eqüator de li concedir l’asil politic e de lo protegir de la persecucion que se’n considèra victima. “Mercegi plan lo pòble eqüatorian, lo president Rafael Correa e lo sieu govèrn”, çò declarèt Assange en un comunicat. “Son pas estats lo Reialme Unit ni lo mieu país natal, Austràlia, qu’an fach qué que siá per me protegir de la persecucion, mas una coratjosa e independenta nacion latinoamericana.” Per Assange, dijòus foguèt lo jorn d’una “victòria istorica”, e mai se “la nòstra lucha es tot just a començar”.
 
Assange a totjorn tengut qu’èra victima d’una persecucion politica, guidada de Washington estant, per aver fach publics de centenats de milièrs de documents classificats del Departament d’Estat sus las guèrras d’Iraq e d’Afganistan e sus las relacions diplomaticas amb los autres païses.