Lo comportament d’un grop de suportaires de l’esquipa de fotbòl PSV Eindhoven, que vesitavan Madrid dimècres passat, a causat una granda indignacion, puèi qu’aquestes s’amusavan en umiliant de femnas que demandavan l’almòina. Dins un vidèo que circula suls rets socials se pòt veire cossí lor lançavan de pèças de moneda pel sòl e cridavan “olé” quand elas se clinavan per culhir l’argent. D’unes lor ne bandissián en las obligant quitament de far de pompas.
 
Los imatges an virat per lo Mond e an causat una granda indignacion, fins al ponch que lo president del PSV, Toon Gerbrands, a degut far una declaracion publica, per dire que lor comportament èra revoltant, que fariá el tot çò possible per identificar aqueles individús e que i auriá “de consequéncias”.