Aperaquí dos cents escolans del licèu Léonard de Vinci de Monistròl de Leir (Velai) manifestèron dijòus passat contra l’expulsion d’una companha e de sa familha, que l’estat francés lor a refusat lor demanda d’asil. S’agís d’una familha albanesa que passèt pel Chambon (Velai) amb tres filhas de 10, 15 e 18 ans. Aquela darrièra es escolarizada a Monistròl e deviá passar son bachelierat en junh. “Arribèron fa tres ans e mièg en França. Se son integrats”, çò declara Solène Prost, membre del comitat de sosten, segon çò que rapòrta La Commère 43. De son costat, Nicolas Clément, un escolan de primièra, apond qu’”es inadmissible de chaçar una familha que s’es integraa e qu’es en perilh se torna dins son país”.
 
Delà aquel acamp de protèsta, los liceans de Monistròl an lançat una peticion en linha via lo Ret Educacion Sens Frontièras (RESF) e an creat una pagina de sosten sus Facebook.
 
 
Salvats per un malaise cardiac
 
La familha deviá èsser expulsada lo 14 de febrièr. Aquel jorn de ser, un quinzenat de policièrs se presentèron a lor domicili sus òrdre de la prefectura per una expulsion express, çò es de 20 a 30 minutas per culhir lors afars abans de partir sul pic per Lion (Arpitània) ont devián pojar dins un avion que los menarián en Albania. Mas mentre qu’èran detenguts en tot esperar lo despart, la maire foguèt victima d’un malaise cardiac e la menèron a l’espital. Pel moment, l’expulsion es reportada, del temps que los liceans de Monistròl e l'RESF se son solidarizats amb la familha.