L’occitan Pierre Vaultier es proclamat campion del Mond d’Snowborard SBX, après la finala del campionat mondial, que dimenge passat s’organizèt en Aran. La campiona femenina es l’esportiva lombarda Michela Moioli. Es lo quatren còp que Vaultier ganha lo Glòbe de Veire. En aquesta ocasion, l’esportiu briançonés recebèt lo trofèu de las mans del basco Lucas Eguibar, ganhant de l’edicion passada, qu’ongan a obtengut lo bronze. Lo Conselh General d’Aran parla d’un eveniment màger ont los espectators poguèron veire de sauts pels quals “es riders arribauen a volar enquia 25 mètres”.
 
Lo país del cap de Garona aculhiguèt los 72 melhors esportius d’aquela disciplina que s’amassèron dins la zòna de Blanhiblar de Beret. Jos l’agach de mai de 3000 personas que seguiguèron l’eveniment sus plaça dins l’estacion d’esquí de Vaquèira-Beret, la Val d’Aran demostrèt sa capacitat d’organizar d’eveniments esportius de portada mondiala.
 
Al vilatge situat sus la linha d’arribada, los assistents trobèron de capitèls de fabricants de material esportiu e tanben una mòstra de la gastronomia d’Aran. “Entara Val d’Aran compdar damb ua pròva d’aguest nivèu ei un revulsiu entà mostrar-mos ath Mond coma destinacion esportiua de maximal interès”, çò afortiguèt lo vicesindic Luís Carlos Medina, que felicitèt totas las personas que trabalhèron a l’organizacion de l’eveniment.