La direccion de l’Ofici dels Dreches Umans de l’ÒNU a condemnat los atacs aerians que se son debanats en Iemèn, faches per la coalicion qu’a coma cap l'Arabia Saudita. Los atacs, amb de tòcas civilas confirmadas, an provocat 106 mòrts.
Las Nacions Unidas an pogut confirmar que l’atac fach sus la vila d’Hajjah per de fòrças aerianas de la coalicion qu’ajuda Arabia Saudita en sa guèrra contra los huthis aurián tuat 106 personas, dont 24 mainatges. Aquò fa d’aqueste atac lo pièger de tot 2016.
Pasmens, la coalicion a totjorn negat qu’ajan fach d’atacs aerians indiscriminats –çò es, d’atacs ont i a pas de còlas militaras—, un fach planhut per la comunautat internacionala.
Après aver vesitat lo luòc de l’atac, de nauts oficials de l’ÒNU confirmèron qu’“avián pas trobat cap de pròva de tòcas militaras aprèp lo quadre dels atacs, un mercat, e aquò voldriá dire que l’Arabia Saudita e los païses que l’ajudan aurián comés una violacion de las leis internacionalas”.
Una guèrra ont las tòcas son civilas
Totun, Ruppert Colville, pòrtavotz del Naut Comissionat pels Dreches Umans de l’ÒNU en Iemèn tanben a confirmat que los huthis e los lors aliats tanben fasián d’atacs contra la populacion civila, çò que constituís, tanben, de crimes de guèrra.
Tot indica qu’aquela coalicion tanben auriá bombardat un autre mercat, aqueste còp a Sana, amb un resultat de 39 mòrts. Segon l’ÒNU los huthis e lors aliats aurián provocat ja mai de 5200 civils mòrts e 5700 ferits.
“Sembla que las accions d’aquesta coalicion —çò diguèt lo Naut Comissariat de lÒNU en Iemèn— fan gaireben mai de mòrts que non pas totas las autras fòrças militaras que i a en Iemèn. Bombardan regularament de mercats, d’espitals, d’escòlas e d’ostals, e aquò es inacceptable”, un fach que poiriá èsser considerat coma de crimes de guèrra contra l’umanitat.
Tot aquò fa partida de la guèrra que l’Arabia Saudita e d’autres païses son a far per ajudar lo govèrn de Iemèn contra de rebèls huthis que sostenon l’expresident del país. Dempuèi lo començament de la guèrra, l’Arabia Saudita demanda lo sosten dels Estats Units: afirman que, darrièr los huthis, i a Iran, lor enemic comun.
Christian Andreu
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
A l'Emir, las decisions de l'ONU, coma disiá l'autre, li'n tòca una sens far bolegar l'autra.
Lo cert es que l'ONU ha condemnat a l'Arabia Saudita e a sos aliats la pentagona pas musicala, per crims de guerra contra l'humanitat.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari