Despuèi sèt ans, l’IEO a mes en plaça un cors d’occitan au Vau (Brinholenc). Lei promiers cors se faguèron dins un canton deis ancians locaus de l’ofici dau torisme puèi, rapidament, en rason dau nombre d’escolans, dins una sala prestada per la comuna.
I a cada an un dotzenau d’escolans, que venon pas solament dau Vau mai tanben d’autrei comunas dau relarg (Brinhòla, Sant Maissemin, Càrcer).
Mai lo cors es amenaçat per la rintrada en rason dei règlas novèlas que la municipalitat a votat. Efectivament, per respòndre ai degradacions constatadas dins lei salas, es estat votat d’impausar ais associacions que vòlon una sala una demanda uech jorns avans, amb un estat dei luecs avans e après e lo versament d’una caucion.
Aquò es segurament ben per una demanda de sala pontuala, mai complica lei causas per un usatge setmanier: i a ja totei lei formalitats, mai tanben lo risc de pas aver la sala... Per certaneis associacions, que seis intervenents rèstan pas dins lo vilatge, es pas solament pensable! Per exemple l’Associacion d’Ajuda ai Victimas d’Accidents e d’Agressions, que son responsable demòra a Ieras, 55 quilomètres mai au sud.
Doncas, leis activitats d’un bèu nombre d’associacions s’atròban amenaçadas. Lei reaccions son nombrosas: l’IEO a mandat un corrier a la consolessa, una autra associacion a demandat una entrevista e lo 20 d’avost se tendrà un acamp dei responsables associatius per promòure una accion comuna.
De seguir...
Reinat Toscano
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Leis associacions se recàmpon dimarts 28. Après veirèm... La Consolessa convèn en privat que lo sistema votat pòu pas foncionar...
(de seguir)
Entrevista dau 22 remandadasensa explica à una data ulteriora, probablament dins lo corrent de setembre... En soma, quora leis Associacions auran ja començat son trabalh, doncas tròup tard...
Mai lei responsables associatius locaus làisson pas l'afaire!
(de seguir)
Lo 20, doncas, s'es tengaut un acamp de responsables d'associacions. N'es eissida una tièra de problemas, e siam anats immediatament demandar un rescòntre amé la Consolessa. Se vesèm deman (son burèu risca d'èstre pichonet per aculhir tot lo monde qu'i vòlon anar!)
Anam demandar que lo noveu dispositiu siegue pas mes en plaça, dins l'espèra dau Consèu Municipau venent que podrà votar autra causa en prenent en còmpte nòstrei problemas.
De seguir...
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari