Entà hestejar eth Dia Mondiau dera Poesia, se hec diluns passat en Musèu dera Val d’Aran un recitau poetic entitolat “Era poesia en temps des «Ordinaciones»”, en escadença deth 400u aniversari dera promulgacion des “Ordinacions” de Juan Francisco de Gracia, un document qu'actualize e compile era administracion aranesa en 1616. Pr’amor d’aquera commemoracion se liegeren poèmes deth començament deth sègle XVII, d'autors occitans d'aqueth temps: Pèire Godolin —eth gran poèta mondin—, Andrèu du Pré, Bertran Larada —eth poèta de Montrejau—, Guilhèm Ader, Joan Giraud d'Astròs e tanben d’autors catalans: el Rector de Vallfogona, e castelhans: Sor Juana Inés de la Cruz, Francisco de Quevedo e Eugenio Gerardo Lobo. Pr’amor qu'enguan tanben ei er aniversari dera mòrt de William Shakespeare e de Miguel de Cervantes, se liegeren poèmes d’aqueri autors, acompanhadi dera guitarra per Mario Lillo, qu’auferic composicions musicaus —pavanes, dances o variacions— des sègles XVI e XVII des compositors Thoinot Arbeau, Luys de Narváez, Le Roy, Lovy o Dowland.


Omenatge a Rosèr Faure
 
Era serada poetica, que volec èster un aumenatge postum entara nòsta amiga e companha Rosèr Faure, siguec coorganizada peth Musèu dera Val d’Aran, er Institut d’Aran, er Archiu Generau d’Aran, era Bibliotèca Generau de Vielha, era Bibliotèca Municipau de Naut Aran e era Escòla Musicau Val d’Aran.
 
 
 
 
Xavi Gutiérrez Riu