L’Organizacion Mondiala del Torisme (OMT) a comunicat que condemna los atemptats de Brussèlas. L’OMT es l’organisme de las Nacions Unidas “encargat de la promocion d’un torisme responsable, duradís e accessible per totes”.
 
Vertat que fa un pauc pietat de consultar los darrièrs comunicats de l’OMT: l’OMT condemna amb la mai granda fermesa los atemptats de Brussèlas; l’OMT es en estat de chòc aprèp lo terrible atemptat d’Istanbul, en Turquia; l’OMT esmoguda pel tragic accident del vòl de FlayDubai.
 
Tant o mai important per l’economia mondiala que l’exportacion de petròli, que l’exportacion d’aliments, es lo torisme. Segon las donadas de l’OMT, l’indústria del torisme representa un 10% del PIB mondial, lo 9,09% dels emplecs mondials, lo 6% del comèrci mondial... Representa 1,5 miliards de dolars en exportacions... 1 138 milions de personas toristegèron per d’autres païses en 2014, aquò vòl dire lo 15,4% de la populacion mondiala.
 
 
Moment de panica borsièra
 
Ièr Estat Islamic tornèt atemptar contra l’indústria del torisme e contra l’economia mondiala.
 
Ièr de matin las borsas europèas vegèron l’enfonzament de grandas companhiás aerianas e entrepresas toristicas: IAG (International Airlines Group, holding nascut de la fusion de British Airways e Iberia), vegèt a un moment una pèrda d'escotisson d’un 5,27%; Air France-KLM tombèt d’un 4,25%, Ryanair d’un 4,34%...
 
Ièr l’aeropòrt de Brussèlas-Zaventem barrèt immediatament aprèp los atemptats e uèi dimècres serà encara barrat. Brussels Airlines s’afanèt d'anonciar la cancelacion de totes los vòls de uèi dimècres que partissián de l’aeropòrt internacional de Zaventem. Aquò vòl dire 24 000 passatgièrs, aquò vòl dire 24 000 remborsament de bilhetas. E parlam d’una sola companhiá.
 
L’equacion es simpla. Un aeropòrt barrat vòl dire d’avions que vòlan pas; d’avions parcats vòl dire d’argent perdut, de gròssas pèrdas per la companhiá aeriana. Ièr las entrepresas toristicas fasián sa prevision de pèrda o de diminucion de ganh, dins lo melhor dels cases. S’òm crompa d'accions d’una companhiá aeriana o toristica, se fa dins l’amira de tocar los dividends, que son lo repartiment proporcional del ganh. Se i a pas de ganh, i a pas de dividend. Se lo torisme quita d’èsser un bon investiment, l’investidor vendrà sas accions e cercarà d’investir endacòm mai.
 
Fin finala, la fin de la jornada borsièra foguèt pas terribla. IAG, per exemple, finalament clavèt la session en pèrda solament del 2,36%. Qual o auriá dich a 9h30? Mas Goldman Sachs aconselhèt qu’aquel èra lo bon moment de crompar accions bon mercat d’IAG, e los investissors profechèron de l’escasença.
 
Pel moment sembla que l'Occident crei que son modèl toristic pòt durar.
 
Foguèt pas terrible, economicament parlant, mas foguèt un avertiment.
 
 
Jornadas de panica economica dins l’Estat Islamic
 
I a pas de borsa a Raqqa per poder crompar e vendre d'accions, e tanpauc dins cap d'autra vila de l’Estat Islamic. Lai, l’economia de mercat es un pauc diferenta. Mas l’economia s’i enfonza tanben, e dins un enfonzament durable.
 
Es pas estat causa dels bombardament aliats, ni de la guèrra contra las milícias kurdas, ni contra l’armada de Bashshar Al Asad... L’Estat Islamic es una victima collaterala de la guèrra economica que l’OPÈP, contrarotlada per l'Aràbia Saudita, mena contra la Republica Islamica d’Iran.
 
Lo lector entresenhat sap qu'Iran fa pas pus partida de l’ais del mal, Iran es vengut còp sec un país respectable que pòt donc vendre petròli. Mas los sauditas an decidit que se daissaràn pas far. Per vendre de petròli, caldriá investir fòrt dins l’indústria del petròli, e ara investir dins lo petròli sembla pas un negòci segur. Ara lo petròli de l’OPÈP còsta un 70% mens qu’en 2014.
 
Arunan l’Estat Islamic vendiá son petròli a 30-40 dolars lo barril. Pagava lo còp prene de risques, que lo petròli legal costava 100 dolars. Uèi l’OPÈP vend a 40 dolars, e aquò a fach far quincanèla Veneçuèla, Nigèria e l’Estat Islamic.
 
Segurament, a fòrça wahhabistas sauditas la falhida del regim wahhabista d’Estat Islamic los es de grèu. But business is business.
 
 
 
Manèl Zabala