Ara que China, primièr mercat mondial pel trafec d’evòri, a promés d’ajudar a salvar los elefants, un aucèl pauc comun del Sud-Èst asiatic, lo calao, es menaçat coma espécia, pr’amor que lo sieu crani es vendut illegalament coma alternativa a l’evòri, çò confirman de fonts conservacionistas.
 
Lo calao, que ja a perdut pendent las darrièras annadas una bona part del sieu abitat en Malàisia e Indonesia, es doncas en una situacion encara mai malaisida per la caça que patís. Aital, e solament en cinc ans, mai de 2000 calaos serián estats caçats e mòrts, segon l’Agéncia d’Investigacion Environamentala. De toristas chineses son estats tanben trobats amb de cranis de calaos dins divèrses aeropòrts en direccion de China.
 
Lo Calao es una espécia classada dins l’Annèxe I de la Convencion sul comèrci internacional de las espécias de fauna e de flòra salvatjas menaçadas d’extincion. Aquò vòl dire qu’es al bòrd de l’extincion e que lo sieu trafec solament pòt èsser permés en de circonstàncias excepcionalas. E China e totes los païses del Sud-èst asian ont demòra an signat aquela convencion.
 
Vendut coma evòri roge
 
En China, los cranis de Calo son venduts coma evòri roge e transformats en joièls a causa de lor color polida, segon l’Agéncia d’Investigacion Environamentala. En 2014, un autobús que veniá de la vila chinesa de Shenzhen, transportava 286 cranis de calao, çò qu’es una vertadièra menaça per l’espécia.
 
Mentretant, China a promés d’ajudar a salvar los rinocèros e los elefants africans. Lo sieu president, Xi Jinping, prometèt a Barack Obama fa qualques jorns que “metriá totalament fin al trafec d’evòri illegal en China”.
 
Mas ara divèrses conservacionistas ja alèrtan qu’aqueste tràfic illegal se virarà vèrs d’autras espécias tanben en perilh d’extincion, coma lo calao, “pr’amor que los criminals —ço diguèt un portavòtz de l’Agencia d’Investigacion Environamentala— son d’oportunistas e an totjorn lo besonh de crear de mercats novèls”.
 
 
 
 
Christian Andreu