Dinc a 2009 los mèdias e politics locaus pensavan a perennizar los 1600 emplecs deu sit industriau Ford de Blancafòrt. La societat alemanda HZ Holding e lo grop industriau Johann Hay coma partenaris màgers crompèren lo sit Ford dab una prima de 12 milions auferida per l’Estat francés. Las collectivitats locaus, la region e la CUB, s’impliquèren financeirament dens lo projècte. Lo projecte de represa n'èra pas tan clar qu'aquò, vist que los navèths caps hasuren compréner que n'èra pas possible per eths de perpausar tant d'emplecs suu sit, sustot se la societat HZ utilizava la moneda deu sit gascon per ajudar una auta filiala de la societat en Lorena. En abriu 2010 aprenurem oficiaument que las bancas èran tostemps estadas bèth drin reticentas per finançar aqueste investissament. En seteme de 2010, l’equipamentièr automobile alemand Johann Hay getèt l’esponja. 

 

Davant la mauescaduda d'aquera represa, l'estat e las collectivitats voluren trobar una solucion per evitar una navèra catastròfa economica. En 2011 Ford tornèt crompar lo sit FAI. Totas las condicions d'arrecrompas dab l'ajuda deu comitat interministeriau a las Restructuracions Industriaus son enqüera desconeishudas. En 2012, los projèctes ne permèten pas d'assegurar per las annadas a viéner mei de 800 emplecs sus los 1000 promés l'an passat. Uei lo dia, la solucion perpausada per l'industriau es una utilizacion importanta deu caumatge parciau.

 

Lo chepic màger peus sindicalistas qu'es la abséncia de projècte clar per l'aviéner. Sustot que segon lo comunicat de premsa deu sindicat CGT de 3 d'abriu, Ford enregistrèt au mes de març las milhoras ventas de veituras en Estats Units desempuish cinc ans. Totun, Ford investís un chic en Tunisia e en Mexic, mès perpausa cap de projècte plan definit en Occitània.

 

Que pòt semblar simbolic, mès a la dintrada deu sit apareishèva lo logotip gigant de Ford dinc a 2009. Dab la lor represa deu sit, Ford ne vol pas tornar botar aqueth logotip, que peus tribalhadors de Blancafòrt es mei qu'un simple simbèu: que representa la perennitat industriau deu sit dab la preséncia de la firma americana. E lo mond se demandan benlèu si Ford ne vòu pas trop justament se perennisar suu sit.

 

EG