Qualques 1200 personas s’amassèron ièr dimenge a La Jonquera (Païses Catalans) dins un acamp per “escafar la frontièra” artificiala que dividís lo Principat de Catalonha en dos estats desparièrs.

Organizats per l’Assemblada Nacionala Catalana (ANC), s’amassèron a La Jonquera cinc caravanas de veïculs venent de Puigcerdà per Prada de Conflent, de Ceret, de Salsas, de Figueres e de Girona en amassant los que venián del sud. La primièra caravana foguèt guidada per la còla de Motards Independentistas.
 
L’acte, presentat per la jornalista de Ràdio Arrels Laura Bertran, comptèt amb de parlaments e de concèrts d’una longa lista d’escrivans, jornalistas, istorians, professors universitaris, actors, musicians e elegits.
 
L’actritz Montserrat Carulla se presentèt coma “catalana, actritz e independentista”, e remembret lo “besonh d’avèr un estat pròpri, materializat per l’ANC e per l’Assemblada de Municipalitats al delà dels partits politics”.
 
Los discorses viravan a l’entorn de l’incapacitat del modèl autonomic espanhòl amb las nacions de l’estat o la manca de poder decisiu dels catalans. Hervé Pi, de Catalonha Nòrd diguèt que “lo pòble catalan es vengut madur e que lo Principat de Catalonha deu liderar l’independéncia del rèsta de Païses Catalans”. Del sieu costat, l’escrivan Joan Lluís Lluís remembrava la paradòxa que “per quitar d’èsser d’espanhòl primièr o cal èsser”.
 
Lo cantaire Francesc Ribera, conegut per Titot, remembrava que “fa 30 ans èrem 1000 independentistas del temps que uèi ne sèm 4 milions” e afirmava que “los catalans presentarem un modèl d’estat just e exportable”.
 
Clavèt l’acte l’actor Toni Albà que declarèt qu’èra catalan perque voliá, e basèt lo sieu discors contra l’imperialisme e contra lo racisme.
 
Aquel acte se debanèt dins l’encastre de la Marcha per l’Independéncia, qu’a ja organizat mai de 200 actes e a mobilizat mai de 30 000 personas.
 
La Marcha per l’Independéncia se vòl acabar en una manifestacion plan nombrosa a Barcelona l’11 de setembre. L’idèa de l’ANC es d’amassar mai de tres milions de manifestants per que la declaracion d’independéncia de Catalonha venga lèu.

Qualques collectius occitans, coma País Nòstre, an anonciat la lor participacion en aquela manifestacion; un Estat catalan independent portariá atanben l’oficialitat de la lenga occitana a l’UE e quitament a l’ÒNU.