Qualques 500 jornalièrs andaloses comencèron dijòus 16 d’agost una caminada que pendent vint jorns percorrerà Andalosia. S’agís d’una protèsta contra la politica espanhòla de reduccions budgetàrias e la situacion generala derivada de la crisi economica. Marcha amb eles Juan Manuel Sánchez Gordillo, lo cònsol de Marinaleda, la vila coneguda pel sieu foncionament autogerit e la siá democracia participativa.

Los manifestants percorreràn qualques vilas per exigir que lo govèrn espanhòl nacionalize las bancas e que meta fin a las reduccions budgetàrias e socialas que son a impausar. Protèstan mai que mai contra lo fach que calga pagar los medicaments, contra las expulsions de mond de la lor demorança e manifèstan tanplan contra lo naut taus de caumatge e de licenciaments. Son per la cession de las tèrras publicas als trabalhadors e per que “lo deute de las bancas lo paguen las bancas”, en demandant que s’arrèste lo plan de salvament bancari e las expulsions de la lor demorança dels qu’an de dificultats per pagar.
 
Sánchez Gordillo declarèt que la marcha es un ensag de jónher los ciutadans urbans e los rurals, e espèra tanben que de cònsols d’autras vilas ragantaràn la marcha. “I a de personas qu’an pas pro per manjar al sègle XXI, aquò es una absoluda vergonha”, çò diguèt.
 
Lo cònsol de Marinaleda participèt en un dels dos assauts de supermercats qu’organizèt lo Sindicat Andalós dels Trabalhadors (SAT), qu’el dirigís. Participèt pas dirèctament al pilhatge de produches de primièra necessitat, ben que sosteniá l’iniciativa amb un megafòn de la carrièra estant. Ara per ara, sèt personas son estadas arrestadas.
 
Sánchez Gordollo es pas estat arrestat pr’amor de l’immunitat qu’an los elegits (al delà de cònsol de Marinaleda, es deputat al Parlament d’Andalosia), mas a declarat que renóncia a la siá immunitat per afrontar lo jutjament.

Dins los darrièrs meses, l’Estat espanhòl es estat la scèna d’una seguida de protèstas contra las reduccions budgetàrias e l’austeritat del govèrn de Mariano Rajoy. De milièrs de personas an manifestat, dins qualques cases amb de fòrts incidents.