Tolomont (en francés Touloumont) serà, probable, lo nom de la region Lengadòc-Roselhon-Miègjorn Pirenèus. Lo Comitat del nom de la region a decidit fin finala de cercar un nom consensual, après las discussions passionadas dels divèrses actors e dels sondatges que se publican pertot sul ret. Tal serà lo nom de la region que se prepausarà lo 24 de junh que ven, e que lo conselh d’estat ratificarà lo 1r d’octòbre.
 
Aquel nom “es eissit de l’acronim de las doas capitalas de la region, doncas Tolosa e Montpelhièr, e es a l’encòp un polit jòc de mots, car en occitan se poiriá legir coma  «tot lo mond» çò que donariá l’idèa d’un territòri d’aculhença e de convivéncia”, çò diguèt Jean-Louis Chauzy, president del novèl CESER Lengadòc-Rosselhon Miègjorn-Pirenèus, desenant CESER Tolomont. De son costat, Joan-Francés Laffont, membre el comitat del nom, explicava a France 3 los critèris de l’eleccion: “un nom per representar la region, a l’interior de la region per lo monde que vivon aquí, e tanben a l’internacional, e tanben per l’emplec, las entrepresas, pel comèrci… tot aquò deu far efectivament sens”.
 
 
Catalonha se sentís pauc representada
 
De son costat, lo collectiu SEM, que prepausava lo nom Occitània-Catalonha, a plangut la decision. Lo collectiu nòrdcatalan deplora qu’aquel nom represente pas lo territòri catalan de la region. “Foguèrem qualques milièrs a desfilar en 2005 a Perpinhan contra lo projècte de Georges Frêche de cambiar lo nom de la region en «Septimània»”, çò remembra lo collectiu en tot insinuar que i poiriá aver una nòva protèsta.
 
Per contra, acceptarián ben un nom dins la meteissa linha. “Pertolomont” incluriá una mençon de Perpinhan “e se poiriá legir «per tot lo mond» parièr en catalan e en occitan”.