Lo popular jornalista tecnologic estatsunidenc David Pogue demandèt a la siá nòvia, per mejan d’un cortmetratge, se se voliá maridar amb el.

David Pogue es un famós jornalista del New York Times especializat en tèmas de tecnologia. La siá popularitat, al delà dels sieus articles, l’a aquerida perque explica de novetats tecnologicas e d’engenhs electronics dins los sieus podcastes en vidèo. La setmana passada, totun, passèt l’òsca: mejançant aqueste cortmetratge çai-jonch, demandèt a la siá nòvia se se voliá maridar amb el.
 
Lo 15 d’agost, Pogue capitèt d’amassar la siá familha e la familha de la nòvia dins un petit cinèma. Abans lo filme qu’anavan veire, faguèt projectar sus l’ecran un cortmetratge qu’aviá fach sus la lor istòria d’amor.
 
Per o adobar, amaguèt una camèra dins lo cinèma e enregistrèt en tot moment la reaccion de la gojata. Fin finala, davant las familhas, li prepausèt de se maridar. La responsa d’ela foguèt un “òc!” plan arderós.