Robert Fisk se demandava dins son article abitual de The Independent, lo 27 de mai passat, perqué David Cameron e los Estats Units avián pas celebrat coma caliá la casuda de la vila de Palmira dins las mans del govèrn d’Al Asad. Dins l’article insinua qu’aqueles dos païses pòdon veire una utilitat al nomenat Estat Islamic. L’endeman, lo director de Vilaweb, Vicent Partal, analizava l’article de Fisk. En seguida vos n’ofrissèm una adaptacion en occitan.

La casuda de Palmina dins las mans de l’armada siriana es, sens cap de dobte, la nòva mai importanta dels darrièrs meses per rapòrt al nomenat Estat Islamic. Dempuèi dos ans, l’Estat Islamic teniá una expansion constanta. Ganhava de territòri e aumentava sa capacitat militara, economica e d’organizacion. Plusors analistas avián previst qu’aquela expansion se poiriá pas sosténer e que la reculada de l’organizacion seriá la pèça clau per començar d’arrestar lo fenomèn, non solament a l’Orient Mejan mas tanben en Euròpa. Lo nomenat Estat Islamic es un grop millenarista que defend que nos aprocham de la fin del Mond e que son expansion n’es la pròva. Per aquò los far recular es tant important. E pasmens...
 
E pasmens, paradoxalament, la casuda de Palmira dins las mans del govèrn sirian es estada una nòva pauc remarcada e encara mens festejada. Lo contrast amb l’avalanca de nòvas que seguiguèt la casuda de Palmira dins las mans del nomenat Estat Islamic es estonant. Aqueste còp pauques gròsses títols, pauc de plaça entre las nòvas màgers e un silenci practicament total en çò de las cancelariás europèas e del Departament d’Estat estatsunidenc. Perqué?
 
Aquela question la se pausava Robert Fisk lo 27 de març passat dins son article abitual de The Independent. Dins l’article, se demanda cossí va que David Cameron e los Estats Units ajan pas celebrat coma caliá la casuda de la vila de Palmira dins las mans del govèrn d’Al Asad. Una question qu’a desencadenat una polemica plan notabla.
 
Fisk es un dels jornalistas mai expèrts de la politica de l’Orient Mejan. Demora a Beirut, trabalha dins la zòna dempuèi 1975 e a viscut dirèctament gaireben totes los grands eveniments d’aqueles darrièrs decennis que tanhon lo mond arabi e islamic. El e lo correspondent de La Vanguardia Tomàs Alcoverro son considerats coma las principalas autoritats tocant lo mond arabi. Sas cronicas e sos libres desencadenan generalament fòrça polemica, perque ditz totjorn çò que pensa e ditz plan sovent de causas qu’agradan pas, mas o fa de faiçon documentada.
 
Doncas, ara la question de Fisk es de saber perqué Cameron e Obama an pas festejat coma caliá l’importanta desfacha militara del nomenat Estat Islamic. E la responsa es inquietanta.
 
D’un costat, atribuís al regim d’Al Asad, a sos aliats pèrsas e libaneses d’Hizbullah e a la Russia de Putin aquela importanta victòria militara. E se demanda cossí va que los Estats Units ajan pas bombardat las tropas del nomenat Estat Islamic fins al darrièr moment, quand la vila èra ja estada practicament reconquistada. Fisk respond amb una conclusion que cèrtament chepica e li a portat de duras criticas: “They wanted to destroy Isis, but not that much” (“Volián destruire Estat Islamic, mas pas tant qu’aquò”). E avertís encara que plan lèu las tropas sirianas poirián reconquistar Raqqa, la capitala e lo centre del nomenat Estat Islamic, al mièg del silenci e l'Occident.
 
(Cal esclarzir que lo Departament d’Estat dels Estats Units celebrèt la liberacion de Palmira, mas en remarcant que sabiá pas quin impacte aquesta poiriá aver sus la situacion siriana, un comentari vertadièrament estonant.)
 
 
Una umiliacion per Occident?
 
De la responsa de Fisk se dedutz que los Estats Units e lo Reialme Unit an pas d'interès real a destruire Estat Islamic perque los interèssa prioritàriament de tombar lo regim dictatorial d’Al Asad. Una acusacion que, après los atemptats de París e Brussèlas, es particularament ponhenta, pr’amor qu’aquò implica que los dos païses pòdon veire una utilitat al nomenat Estada Islamic, ça que la.
 
Mas aquò es pas tot. Fisk pensa tanben que l’operacion a Palmira es estada una umiliacion per l'Occident e qu’aquò explica una partida de la reaccion tant estranha. Lo 27 de setembre passat, el meteis escriguèt un article sus l’intrada de Russia dins la guèrra, que disiá que Vladimir Putin aviá decidit que l’armada èra la sola institucion que poiriá tornar far Russia, qu’el l’armava e que per tant l’entraïnava a marcha forçada. Pronosticava ja alavetz la casuda de Palmira dins las mans de l’armada siriana, e mai s’anoncièt que se passariá d’una faiçon plan mai rapida de çò que s’es passat.
 
Ja alavetz, lo correspondent de The Independent afirmava que se l’intrada en jòc de Russia implicava un grand cambiament militar seriá una vergonha per l'Occident, qu’a passat quatre ans sens poder destronar Al Asad ni mai eliminar lo nomenat Estat Islamic.
 
 
 
 

---

Aqueste article es una adaptacion en occitan de l’article que Vicent Partal publiquèt en catalan sus Vilaweb lo 29 de març passat