Txarango es un grop catalan de musica qu’en Occitània lo coneissèm ben, mai que mai après lor vesita engatjada a l’Estivada de Rodés en 2014. Ara es conegut tanplan al camp de refugiats d’Eidomeni (o Sehovo), a la frontièra estatala de Grècia amb Macedònia. Los musicians i anèron per conéisser de près la situacion dels refugiats e ajudar. Lo cantaire Aguer Miquel explicava l’experiéncia sus Catalonha Ràdio e Vilaweb ne publiquèt un reportatge escrich per Txell Partal.
 
 
“Dètz minutas après aviam ja quatre concèrts organizats”
 
“L’idèa èra d’i anar per ne conéisser la situacion”, çò explicava Alguer Miquel. “Anar coma tant d’autras gens qu’ajudan aquí”, çò precisèt. “I portèrem los instruments se per cas podiá servir a quicòm; e es pas una causa d’una autra planeta que i aja de musica dins un endrech aital; e doncas se los podiam emplegar. Dètz minutas puèi aviam ja quatre concèrts organizats dins los diferents camps de refugiats.”
 
Miquel reconeguèt qu’un dels moments mai esmovents del sojorn foguèt quand daissèron lors instruments per que qualques refugiats musicians poguèsson jogar e recuperar, per un instant, lor vida anteriora en fasent de musica.
 
 
La vida a Eidomeni s’arrèsta pas
 
Un dels autres moments que marquèt lo viatge foguèt quand, après jogar dins un dels camps, una femna demandèt al cantaire de l’acompanhar dins sa tenda per li far conéisser sa filha. Quand lai arribèt i rescontrèt una enfantona de sèt jorns qu'èra nascuda ailà. La vida a Eidomeni s’arrèsta pas.
 
“Son de mond tras que tranquils qu’ensajan totjorn de te suscitar un sorire e de dignificar lor situacion. Son absoludament reconeissents de totas las gents que los ajudan aquí”. Alguer Miquel reconeis que l’a frapat fòrça l’actitud de las gents, “son de mond fòrça benvolents e tranquils, pausan pas jamai de problèmas als grècs”.
 
 
“Lor i cal anar”
 
En mai d’aquò, reconeguèt qu’èra fòrça tocat après l’experiéncia a Eidomeni: “Los camps son de tendas ont i a una odor de plastic plan brutala”. Tanben se mostrèt estonat de veire tant de volontaris catalans a ajudar, e encoratjava totòm a i anar: “totes los qu’o pòscan, lor i cal anar”, e precisèt que “tot çò que nos arriba es deformat”. Lo cantaire reclama sustot que i anen “los govèrns de l’Union Europèa” per ne conéisser la situacion.
 
 
“L’armada de Macedònia bat los refugiats”
 
“Nos arriban aicí d’informacions qu’expulsan las gents dels camps”. Mas los refugiats “contuhan d’arribar aicí”, çò explicava en confirmant çò que publicàvem ièr sus Jornalet:  los qu’arriban o fan ara coma detenguts e son deportats en Turquia. Arriban estacats amb de bridas de plastic a cha dos e dins de condicions reprensiblas”. En mai d’aquò, explica que “l’armada de Macedònia bat los refugiats”.
 
 
Espèran un tren que passarà pas
 
“Eidomeni es una gara de tren, mas per las vias i passan pas mai de trens”, e aquò crèa una situacion un drin poetica: “Son plantats en esperant un tren que passarà pas jamai”. Alguer Miquel explica que quand eles i èran corriá la rumor que lo 4 d’abril dobririán las pòrtas, e mai se totes sabián qu’èra pas vertat. “Es un biais de calmar los estats d’esperit del mond”.
 
 

 
 
 

---

 
Dètz TV entrevistèt la còla de Txarango a l’Estivada 2014
 

TOPINA#2 from dètz on Vimeo.

 
 
Concèrt de Txarango a l’Estivada 2014