Fa cinc ans que lo govèrn suedés dobriguèt un compte Twitter a totes los ciutadans, gerit cada setmana per un “comissari” diferent, amb la tòca de donar divèrses vejaires del país. Ara, dins aquela meteissa linha, l’Associacion de Torisme oficiala del país a activat un numèro de telefòn, lo +46 771 793 336, per fin que quin torista estrangièr que siá i pòsca telefonar e parlar amb de ciutadans que respondràn aleatòriament.
 
 
Lo primièr país del Mond a abolir la censura
 
Los usatgièrs del telefòn, amb lo còst d’una telefonada internacionala, pòdon demandar d’informacions del país al resident suedés que respondrà a la telefonada. Lo Swedish Number (Numèro Suedés) es una iniciativa toristica innovanta per commemorar que, fa 250 ans, en 1766, Suècia foguèt lo primièr país del Mond a abolir constitucionalament la censura: “Per remembrar l’anniversari, Suècia es ara lo primièr país del Mond a aver lo sieu numèro de telefòn”.
 
Los ciutadans suedeses que vòlon respondre a de telefonadas se devon installar una aplicacion especifica dins lor telefòn mobil. Quand una persona respond a una telefonada del numèro del país, lo numèro particular demòra amagat.
 
Dins las primièras oras de mesa en marcha del telefòn especial, la màger part de las telefonadas provenián de Turquia, los Estats Units, lo Reialme Unit, Alemanha e Àustria.