Cuba aplica a gratis lo primièr vaccin contra lo càncer del palmon, çò rapòrtan Página Popular, Havana Times e Público entre divèrses mèdias. Lo Centre d’Immunologia Moleculara (CIM) de l’illa caribenca a mes a la disposicion de totes los cubans un novèl tractament qu’arrèsta l’avançada de la patologia sens afectar la qualitat de vida de las personas. “Los resultats del vaccin donan una subrevida als pacients, s’elimina pas la tumor mas se n’arrèsta la creissença, çò que permet als pacients de poder viure mai longtemps, e sustot, amb una bona qualitat de vida pr’amor que la toxicitat es minimala”, çò afirma lo cercaire del CIM Arlhee Díaz-Miqueli.
 
 
Arrèsta la creissença de las tumors
 
An calgut 25 ans per que los especialistas del CIM de l’Avana desvolopen lo vaccin, nomenat CimaVax-EGF. Se tracta d’una preparacion analòga de l’EGF (o factor de creissença epidermica), que lor fa mestièr a las cellulas cancerigènas per se propagar. En aplicar aquel medicament, lo sistèma immunologic de l’organisme ataca las cellulas que produson l’EFG e aital s’arrèsta la creissença de la tumor. Lo CIM de Cuba consagra mai que mai son trabalh a la recèrca e produccion de medicaments contra lo càncer, qu’es la principala causa de mòrt dels cubans. Las recèrcas comencèron en 1994 amb la produccion d’anticòrses monoclonals.
 
 
Accès gratuit en Cuba
 
Los cubans an accès al vaccin a travèrs dels espitals de l’illa, e tanben los estrangièrs qu’ajan rejonch lo sistèma de santat del país. Sols los mètges del país son autorizats a aplicar lo medicament.
 
 
Manca d’investiments per arribar en Euròpa
 
Lo vaccin se tròba ja enregistrat en Cuba, Peró e Paraguai. Ara se’n fa d’ensages clinics en Euròpa, ont son d’estudis fòrça cars qu’encara an de besonh 3 o 4 ans per se conclure. Aquò es un obstacle pr’amor que Cuba compta amb una bona còla de scientifics mas a pas pro de ressorsas economicas per lançar lo produch sus los mercats. Es pr’amor d’aquò qu’espèran de se poder associar amb d’investidors internacionals.
 
 
Encara es luènh d’arribar als Estats Units
 
Cuba e los Estats Units “a l’ora d’ara an solament signat un acòrdi de confidencialitat amb un centre de recèrca per escambiar d’informacions”, çò ditz Diaz-Miqueli, que crei qu’es encara luènh lo moment que lo vaccin se poirà distribuir als Estats Units.
 
Barack Obama a retirat qualques unas de las restriccions contra las còlas medicalas cubanas e lors recèrcas. Mas la collaboracion entre Cuba e los Estats Units, en cooperacion de recèrca scientifica e en biotecnologia, deu esperar encara que lo Congrès dels Estats Units se pronóncie per levar definitivament lo blocatge economic, qu’estofa Cuba dempuèi mai de 50 ans.