Ara l’energia del Solelh es illegala dins l’estat espanhòl. Ièr diluns intrèt en vigor una lei que l’aprovèt lo govèrn de Mariano Rajoy per empedir l’autoconsume d’electricitat. Segon aquel còde, se pòt pagar de multas de 30 milions d’euros s’òm capta l’energia del Solelh per far d’electricitat, segon çò que denonciava lo jornal alternatiu Kaosenlared. Aquel jornal soslinhava que las companhiás electricas d’Espanha son administradas per de conselhièrs, d’èx-presidents e d’èx-ministres dels dos principals partits de l’estat, PSÒE e PP, e que poirián aver influit dins la propòsta d’aquela lei.
 
 
Protèsta de Greenpeace
 
Dins un comunicat, l’organizacion ecologista Greenpeace afirma que “lo govèrn del Partit Popular sembla decidit a protegir los interèsses de las grandas companhiás d’electricitat”. Acusan lo govèrn de Rajoy d’empedir “la democratizacion de l’energia” e de “combatre pas lo cambiament climatic”. En mai d’aquò denóncia que lo Ministèri de l’Indústria a pas detalhat cossí se farà complir las complèxas exigéncias tecnicas requeridas per modificar las installacions: “Es impossible de complir las obligacions qu’an establit”.
 
Per tant, Greenpeace a lançat una peticion en linha. “Dins lo país del Solelh, i a pas cap de sens d’entrepachar los ciutadans que produsiscan lor electricitat pròpria, amb una font qu’es renovelabla, abondosa e a bon mercat, e que poiriá reduire la nòstra dependéncia energetica, generar d’energia d’un biais sostenable e descentralizat e desvolopar l’economia ciutadana”, çò ditz l’organizacion environamentala.