Sièis femnas mapuches son a riscar lors vidas per evitar l’extraccion dels idrocarburs per fracturacion idraulica, e se son encadendas a las maquinas de perforacion. O rapòra una cronica de Nancy Piñeiro Moreno, publicada en anglés dins IC Magazine e en catalan dins Nationalia.
 
Se tròban a Campo Maripe, dins l’estat argentin, près de la frontièra amb l’estat chilen, dins un sit que, segon l’Agéncia d’Informacion Energetica dels Estats Units, es lo jaç d’idrocarburs non convencionals mai important d’America Latina.
 
Après de desenats d’annadas de revendicacion, en 2014, lo govèrn de la província reconeguèt legalament Campo Maripe coma comunautat mapuche. Pasmens, se consultèt pas la comunautat al moment d’avalorar los terrens per installar lo sit d’extraccion. En mai d’aquò, aquela activitat deuriá èsser illegala, mas en 2013 l’estat argentin simplifiquèt las leis per permetre la despossession del territòri e atraire lo capital estrangièr.
 
 
La fracturacion idraulica
 
La fracturacion idraulica es una tecnica per far possibla o per aumentar l’extraccion del gas o del petròli de sistre. Lo procediment consistís a injectar d’aiga e de sabla sota pression dins lo terren, per alargar las fracturas existentas dins lo substrat rocós que conten lo gas o lo petròli e ne favorir l’extraccion. Se tracta d’una tecnica emplegada dins aperaquí lo 60% dels poses extractius del Mond, e son usatge s’espandís als Estats Units. Doas zònas d’Occitània serián concernidas: vèrs Alès (Cevenas) e Gardana (País d’Ais).
 
 
Una lucha nacionala, environamentala e feminista
 
La lucha d’aquelas femnas es una de las mòstras mai grandas de la resisténcia indigèna per los movements socials de pertot. O explica María Piciñan, qu’es la pòrtavotz de Lof Newen Mapu e la coordenaira del Centre d’Educacion Mapuche
Norgvbamtuleayiñ:
 
“Quand èrem un pòble liure, las femnas mapuches avián un ròtle d’autoritats tant qu’èran de depositàrias de la coneissença mapuche; en particular, lo ròtle d’ensenhar èra tengut per las femnas. Uèi, lo ròtle de las femnas se fa tornarmai vesedor après l’invasion e l’imposicion d’una autra cultura, d’una autra educacion. E après la subjugacion brutala del masclisme qu’avèm patit coma societat en general, que nos a afectats tanben coma pòble mapuche. Lo ròtle d’educatrises, lo recuperam. Arribam de comprene que sèm pas solament de maires, mas las primièras transmeteiras de la coneissença, e tanben las darrièras”.
 
“Nosautras, las femnas, sèm totjorn estadas engatjadas dins la politica mapuche, en temps de libertat, en temps de repression, e uèi lo jorn. La sola causa que càmbia es lo contèxt. Uèi pòdes veire mai de femnas mapuches que son de pòrtavoses, e i a un fum de femnas que son de caps de lors comunautats.”