Lo primièr ministre d’Ucraïna, Arsenii Petrovich Iatzeniuk, presentèt sa demission al començament d’aquesta setmana. Fasiá dos meses que los sieus sòcis de coalicion del govèrn lo quichavan per que demissionèsse e l’avián abandonat. E mai se Iatzeniuk o refusava, ara a presentat sa demission dins un messatge transmés per qualques televisions del país, ont critica las pressions qu’a patit. A dich que demissiona perque la tension politica paralise pas lo país e a defendut que las fòrças europeïstas bastiscan ara una nòva coalicion per far un govèrn immediatament, amb lo sosten de son partit, se cal.
 
Iatzeniuk aviá superat de justesa una mocion de censura. Pasmens perdèt sul pic lo sosten del partit de l’èx-primièra ministra Iuliia Tymoshenko. En mai d’aquò, Iatzeniuk perdèt tanben lo sosten del partit del president del país, Petro Oleksiiovych Poroshenko, çò que lo daissèt completament sol.
 
La majoritat dels deputats l’acusan d’èsser estat incapable de combatre la corrupcion ni d’introduire las reformas estructuralas que las reclaman la comunautat internacionala e lo Fons Monetari Internacional, en escambi de crèdits nòus al país.