Lo movement Nuèch de Pè arriba en Cabardés. Castanhs serà, probable, lo primièr vilatge qu’organiza una Nuèch de Pè, que se tendrà dissabte a partir de 19h sus la plaça principala, segon çò que rapòrta La Dépêche. Comptaràn amb lo sosten de fòrça mond dels vilatges vesins, coma Concas, Cabrespina o Pradèlas de Cabardés.
 
“Al començament nos demandèrem se deviam activar lo movement a Carcassona”, çò declara Hélène Geyre, una de las iniciairas de l’eveniment. “A la fin, volèm mostrar que los petits vilatges reculats pòdon èsser tanben al fil de l’actualitat e rejónher la lucha”. La consolessa màger de Castanhs “nos a afirmat sosténer lo movement”, çò apond Geyre a La Dépêche.
 
 
L’aculhença dels refugiats en debat
 
L’eveniment metrà en plaça diferents tèmas per debatre. La Lei El-Khomri, qu’es lo detonant de tot aquel movement social, serà “legida davant totes per anar a las racinas de l’informacion e saber de qué òm parla”.
 
L’aculhença dels refugiats sirians serà tanben a l’òrdre dels debats. Lo departament d’Aude “èra censat ne recebre un cèrt nombre, mas es lo silenci total. Fa qualques meses, avèm creat un collectiu per listar las riquessas del territòri e los qu’acceptarián d’ajudar los migrants. I a agut plan de responsas”.
 
I aurà tanplan de tribunas liuras a posita per prene la paraula en public, e “un pauc de musica en fons”.
 
 
Pertot en Occitània
 
En Occitània lo movement es arribat almens a Avinhon, Bordèu, Clarmont-Ferrand, Lemòtges, lo Telh, Marselha, Montpelhièr, Niça, Nimes, Pau, Rodés, Tolosa, Tula, Valença e Vilafranca de Roergue.
 
 
Un movement que s’internacionaliza
 
Lo movement dels indignats franceses nomenat Nuèch de Pè (Nuit Debout), que dempuèi lo 31 de març ocupa la Plaça de la Republica de París, s’estend per tot l’estat francés e quitament a Brussèlas, Berlin, Madrid, Saragossa e qualques vilas dels Païses Catalans. L’iniciativa amassa de milièrs de joves que cada jorn arriban a las plaças amb los afars per campar e s’organizar en assembladas e comissions.
 
La protèsta seguís la cauma generala del 31 de març passat, per protestar contra la reforma del còde del trabalh, la dicha Lei El-Khomri, e aquela cauma se tenguèt jos la crida dels principals sindicats interprofessionals, de qualques organizacions d’estudiants e de fòrça collectius. Pasmens, los manifestants ocupan las plaças e i demòran de nuèch, dreches, de pè, tanben per protestar contra l’estat d’emergéncia e per sosténer d’autras luchas socialas. Per tant, lo movement es vengut una convergéncia dels movements ecologistas, antimilitaristas e d’autres ciutadans malcontents e decebuts per las politicas del govèrn de Manuel Valls; que denóncian quatre ans de mesuras liberalas e reclaman un cambiament.
 
I a un canal sus Internet que rapòrta (de còps en dirècte) çò que se passa sus las plaças.