Fasiá qualque temps que la nòva virava suls malhums socials e foguèt oficializada fa pas gaire: en seguida de problèmas de santat de Brian Johnson, AC/DC va acabar sa tornada amb Axl Rose darrièr lo microfòn.

AC/decès
 
Auriái pogut entitolar aquesta cronica “Acabat AC/DC, vaquí AXL/DC” o quitament “AC/decès”. Cal díser que dempuèi 2014, annada dels 40 ans del primier single del grop, los australians comolan los problèmas.
 
Comencèt amb Malcolm Young, compositor màger de la còla que, en seguida d’un AVC, se trapèt tustat de deméncia grèva, al punt de desmembrar cossí jogar los tròces qu’el aviá compausats pel grop.
 
Dins la seguida, foguèt Phil Rudd, bateire istoric de la còla, qu’aguèt de problèmas amb la justícia: aviá menaçat un entrepreneire e sa filha de mòrt perque, segon el, avián mal gerit un eveniment pel lançament de son disc sòlo. Las rasons d’aquel acte foguèron de bon comprene quand la polícia trapèt a l’ostal de Rudd de metanfetamina, una dròga plan potenta.
 
A causa de la casuda de dos dels sòcis fondadors, AC/DC decidiguèt de baissar pas los braces e de se faire una sortida de pista digna.
 
 
Rock or Burst, un darrièr pel la rota
 
Aital, a la fin de 2014 sortiguèt la 16a galeta de la còla, Rock or Bust, lo primièr disc sens Malcolm, qu’es remplaçat per son nebòt, Stevie, lo filh de Stephen, l’ainat de la brava fratria Young.
 
Las partidas de batariás dins aquel disc son jogadas per Phil Rudd, ça que la sus los clips e per la tornada de sortida del disc, es Chris Slade, bateire que comencèt sa carrièra amb Tom Jones e qu’aviá ja jogat amb AC/DC de 1989 fins a 1994 e que se torna assetar darrièr las barricas.
 
La còla èra lèsta per faire la tornada del estadis, una tornada que totes los afogats esperavan: AC/DC es primièr una còla d’empont e coma totun sentissiá plan qu’aquela tornada seriá la darrièra, òm s’imaginava aisidament que los garçons (los “boys”) aurián talent de quitran e enveja de faire nhacar la polsa als afogats.
 
Ca que la, Dòna Desfortuna aviá pas dit son darrièr mot: en plena tornada estatsunidenca, la terribla nòva tombèt: los mètges van enebir lo cantaire Brian Johnson de montar sus un empont... Se contunhava de faire de scèna, l’òme de la casqueta vendriá sord.
 
Una nòva que tombèt coma un tèrratrem dins lo mitan rock: èra acabat de verai per AC/DC? Aprèp mai d’un bruch de corredor de tota mena: fin del grop, arribada a la canta de Dave Evans, primièr cantaire del grop, d’Iggy Pop, e mai de Cristina Ramos (ganhaira de Got Talent España); e la nòva finiguèt que tombèt, primièr per Stevie Young, puèi oficialament pel grop: AC/DC anava acabar sa tornada en botant darrièr lo microfòn William Bayley, mai connegut coma W. Axl Rose, cantaire dels Guns’n’Roses.
 
 
Un avenidor comol d’incognitas
 
Se la capacitat del cantaire de G’n’R pausa pauc questions per pegar al repertòri d’AC/DC (Angus Young faguèt una “jam” amb los Guns lo 14 d’abril a Coachella per interpretar dos classics d’AC/DC, Riff Raff e Whole lotta Rosie), demòran d’incognitas:
 
— Guns’n’Roses èra en plena tornada de reformacion del sieu line-up istoric amb Slash e Duff Mc Kagan, de que va venir aquela tornada amb Axl que fa l’interim en cò d’AC/DC?
 
— Al moment del primièr concèrt suspresa de reformacion de G’n’R, Axl s’es copat lo pè, li cal assegurar los concèrts assetat per un brave moment (4 setmanas de gip) e quitament puèi li caldrà de temps abans de córrer coma una lèbre.
 
— Los afogats d’AC/DC, son coneguts per èsser d’afeccionats tilhoses (“die-hard fans”): un fum d’entre eles considèran que lo grop s’arrestèt amb la mòrt de Bon Scott (cantaire mitic que se moriguèt negat dins sa racadura en 1980) e acceptèron pas jamai Brian Johnson, doncas serà malaisit per Axl.
 
— Los afogats del grop benlèu o prendràn per mal que Johnson siá estat butat defòra (semblariá qu’aprenguèt qu’èra remplaçat per Axl via la premsa) e pensaràn que lo grop auriá fach melhor d’arrestar o de causir una tièra de cantaires en convidats (“guest”) per acabar la tornada puslèu que de n’embauchar un sol.
 
Alavetz, los d’AC/DC, s’acabaràn aquela tornada mondiala (“world tour”) per la granda o la pichona pòrta? Los occitans auràn la responsa lo 15 de mai, que lo grop se produirà a l’Estadi Velodròm de Marselha.
 
En esperant que tot se passarà plan per çò que risca d’èsser la darrièra tornada d’una de las mai grandas còlas d’hard rock del Mond e que la sola causa qu’aurem de díser, quand la cortina tombarà pel darrièr còp sul costum d’escolan d’Angus, serà “For those about to rock, We Salute You...”
 
 
 
 
Cedric Rousseu
Cocagne.Media
 
 
 
 
 
 

---

Jam d’Angus Young e G’n’R
 

 
 
Jam Acostic dins l’Howard Stern Show que nos mòstra lo costat “uman” d’AC/DC (s’acaba en jam amb lo tecnician que canta amb eles e Brian pòt pas mai cantar tant s’estraça del ríser).
 

 
 
 
For those about to Rock live (River plate 2009)