Actualitats
Marselha: reüssida de la campanha per salvar la Tor dei Catalans
La mobilizacion dels marselheses a forçat la comuna a s’engatjar dins la reabilitacion de la Tor e tanben de la Plaja dei Catalans
A ben reüssit la campanha que se lancèt a Marselha per salvar la Tor dei Catalans, la sola rèsta d’un lazaret bastit en 1558 que se tròba en un marrit estat de conservacion. Per ne denonciar l’abandon, Jean-Noël Beverini, membre de l’Acadèmia dei Sciéncias, Letras e Arts de Marselha, activèt una campanha de signaturas en linha per far pression sus la comuna e per que se restaurèsse la bastissa istorica.
La responsa dels marselheses es estada rapida a multitudinària, amb 10 967 signaturas, çò qu’a forçat la comuna a s’engatjar dins la reabilitacion de la Tor e tanben de la Plaja dei Catalans.
“La Tor e la Plaja dei Catalans son un deis endrechs paradigmatics de la vila”, çò disiá a Le Figaro l’encargat del litoral municipal Didier Réault, fa qualques jorns. Réault assegurava que la tor poiriá venir quitament un petit musèu dobèrt al public sus l’istòria de l’endrech.
Alexandre Dumas immortalizèt los pescadors marselheses sus la Plaja dei Catalans en 1844 dins lo roman Lo comte de Montecristo. Mas l’istòria de l’endrech ven de mai luènh. Èra, de fach, una colònia de pescadors catalans que s’establiguèron ailà pendent lo sègle XVIII. Eles i bastiguèron un petit vilatge, fòra los barris de la Ciutat Focèa, a l’entorn d’un petit espital o lazaret bastit en 1558, que ne demòra la tor.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Content de coneisser aquesta tor e la plaja dels catalans de Marselha, e que la gent hagi demandat a la comuna que l'arreglen e que la plaja continue sent del poble marselhès. Una bona nova, ja era hora que n'hi hagués qualcuna de bona.
A, vesèm enfin Marselha començar de venir "capitala culturala d'Euròpa". Urosament que Massilia, Monsur T. e los Oaï Stars avián pres un pauc d'avança !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari