La Comission de la Cultura e l’Educacion del parlament portugués recebrà d’informacions de primièra man sus la situacion critica del galèc e sus los incompliments del govèrn de Galícia e del govèrn espanhòl sul terren lingüistic. Susana Méndez, d’A Mesa —l’ofici per la normalizacion lingüistica—, deu presentar lo rapòrt sus la situacion del galèc ja liurat en 2015 a la Comission dels Dreches Umans de l’ÒNU e al comitat d’expèrts sus la Carta Europèa de las Lengas. La tòca es que lo parlament de Portugal demande al govèrn autonomic de Galícia e al govèrn de l’estat espahòl de complir la legislacion internacionala en matèria lingüistica.
 
Aquel rapòrt detalha los incompliments de l’estat espanhòl e del govèrn autonomic de Galícia tocant la legislacion —internacionala e pròpria— en matèria de lenga galèga dins los domenis de l’administracion publica, l’educacion, la justícia, los mèdias e la santat.
 
Los deputats membres de la comission seràn imformats dirèctament de las principalas denóncias qu’A Mesa a presentadas aquestes darrièrs ans, e coneisseràn las sièis mesuras urgentas que l’entitat per la normalizacion lingüistica prepausa per redreiçar la situacion: entretant es primordiala la reciprocitat de las televisions publicas galèga e portuguesa.